Уьлкведин меркезда ва саки вири регионра Россиядин полиция арадал атайдалай инихъ 300 йис тамам хьунин юбилейдиз талукьарнавай жуьреба-жуьре серенжемар кьиле тухузва. Россиядин къадим шегьерни гуьгъуьна амукьнач. Ина МВД-дин Дербентда кардик квай отделда шадвилин мярекат тешкилнавай. Ана шегьердин администрациядин, къайдаяр хуьдай органрин къуллугъчийри, зегьметдин ветеранри иштиракна.
Россиядин МВД-дин Дербентда кардик квай отделдин начальник Рагьман Рамазанова кIватI хьанвайбуруз юбилей тебрикна ва гьа са вахтунда лагьана: — Чна къе лишанлу югъ къейдзава. Россиядин полиция арадал гъайидалай инихъ 300 йис хьанва. Дагъустандин МВД-дин къуллугъчияр гьамиша чпин къуллугъдин буржидиз вафалу хьана ва гилани абуру, вири жуьрейрин хаталувилериз таб гуз, намуслувилелди къуллугъзава. Абурукай гзафбурун тIварар тарихда гьатнава. Абурун тIварарихъ куьчеяр, школаяр янава. Жуьреба-жуьре тахсиркарвилер ийизвайбурухъ галаз Дербент шегьердин полицейскийрини уьтквемвилелди женг чIугвазва. Гзаф вахтара чпин чандиз хаталувал, хасаратвал хьунизни килиг тавуна, абуру чпин везифаяр ян тагана кьилиз акъудзава.
Р.Рамазанова пенсиядиз фенвай ва гьеле кIвалахал аламай ветеранриз рикIин сидкьидай сагърай лагьана. Абуру отделдин жегьил къуллугъчийриз чпин девлетлу тежриба чирзава, абуруз кIвалахдин рекьяй куьмекар гузва.
Дербент шегьердин администрациядин кьилин заместитель Дмитрий Дунаева къейд авуна хьи, шегьердин куьчейра къайда-низам хьун, агьалийрин секинвал, чпин хатасузвилихъ абурун инанмишвал, полициядин къуллугъчийрин кIвалахдилай аслу я.
— Куьн Россиядин агьалийрин хатасузвал, лайихлувал, намус хуьнин къаравулда акъвазнава, — лагьана Д.Дунаева — куьне гьукуматди вилик эцигнавай везифаяр намуслувилелди тамамарзава. И кардай квез шегьердин агьалийри сагърай лугьузва. Шегьердин администрациядини квез къулай шартIар тешкилун патал алакьдай вири крар ийизва. Квехъ кIвалахда, шегьерда датIана къайда-низам хуьнин карда агалкьунар хьун кIанзава.
Ада гьакIни кIватI хьанвайбуруз Дербент шегьердин администрациядин кьилин везифаяр вахтуналди тамамарзавай Энрик Муслимован ва шегьердин Собранидин председатель Мавсум Рагьимован тIва-рарихъайни тебрикдин чарар кIелна.
Дагъустан Республикадин къенепатан крарин министрдин приказдалди ва 300 йисан юбилейдихъ галаз алакъалу яз отделдин хейлин къуллугъчийрив хурудал алкIурдай знакар ва гьуьрметдин грамотаяр вахкана.
Мярекатдин эхирдай кIватI хьанвайбуру законар, агьалийрин игьтияжар государстводин аслу туширвал хуьн патал чанар къурбанд авур ксар рикIел хкуналди са декьикьада кисна акъвазна.
Хийир Эмиров
