И йикъара «Лезги газетдин» редакциядиз Н.Бауманан тIварунихъ галай МГТУ-дин къуллугъчи, “Викимедиа РУ” НП-дин (некоммерческое партнерство) член, Википедиядин лезги разделдин администратор Олег Абарников мугьман хьанвай.
Википедиядин лезги хиле хайи чIалал чапнавай макъалайрин кьадар алай вахтунда 4 агъзурдалайни алатнава. Википедия интернетдин майданра авай ачух энциклопедия я. Къе, дуьньядин хейлин чIалар квахьунин хаталувилик акатнавай макъамда, инсаниятди гегьеншдиз менфят къачузвай интернетда лезги чIалал чапнавай малуматар гьикьван гзаф хьайитIа, гьакьван хъсан я. Алай вахтунда дуьньяда 6 агъзурдалайни гзаф чIалар авайдакай гзаф чешмейра кхьенва, амма Википедиядин хилер 3 вишелай гзаф чIаларихъ ава. Лезги чIални и сиягьдик акатун дамахиз жедай кар я.
Гуьруьшдин вахтунда чна Википедиядин лезги хел вилик тухунин, макъалайрин кьадар артухарунин, чапнавайбур ери хъсанарунин месэла веревирдна. Авайвал лагьайтIа, исятда лезги чIалал кардик кутунвай Википедия тарифдай гьалда авач.
Олег Абарникова къейд авурвал, лезги Википедия патал макъалаяр кхьизвайбурун, таржумаяр ийизвайбурун кьадар тIимил я. Чпин ашкъидалди кардик къуьн кутазвайбурни чIалан пешекарар туширвиляй материалар къайдадик кухтунин, къундарма гафар арадай ахкъудунин кIвалах кьилиз акъудна кIанзава.
Олег Абарникова ихтилатайвал, материалрин кьадар артухарун патал, мумкинвал хьайила, махсус конкурсарни малумарзава.
“2015-2016-йисара “Лезги Лувар” фондунин ва ФЛНКА-дин куьмекдалди лезги Википедияда Россиядикайни Дагъустандикай макъалаяр кхьинин кьве конкурс кьиле тухвана”, — къейдна ада.
Са шакни алачиз, интернетдин майданрин куьмекдалди хайи чIал вилик тухунин, машгьурунин барадай лазим жуьреда къайдадик кутунвай лезги Википедиядихъ еке эгьмият жеда.
О.Абарникова редакциядин коллективдиз авторрикай сад вич яз чапдай акъуднавай “Википедия. Вводный курс” тIвар алай ктабни пишкешна. И кьелечI ктабда Википедиядал кIвалахунин рекьяй галай-галайвал баянар ганва.
К.Ферзалиев
