Урусатда, гьакI къе­цепатан уьлквейрани жуьреба-жуьре жавабдар кlвалахар гьакъисагъвилелди кьилиз акъудзавай лайихлу лезгияр тlи­мил авач. Халкьдивай дамах ийиз жедай лезгийрикай сад алай вахтунда Къазан шегьердин медицинадин “Алан Клиник” центрада кlвалахзавай тlвар-ван авай колопроктолог, Россиядин колопроктологрин ассоциациядин член, Татарстан Республикадин лайихлу духтур  Тажидин  Азимович  Гьамидов  я.

“Духтурди начагъ касдин неинки бедендин хирер сагъарун, гьакl руьгьдин азабарни арадай акъудун герек я. Пешекарвилелди эгечlунихъ галаз сад хьиз, психологиядин жигьетдай алакъани важиблу я”, — лугьузва Т. Гьамидова.

Тажидин Гьамидова Дагъустандин мединститутда (къенин ДГМА) чирвилер къачуна. Проктологиядин рекьяй 43 йи­сан тежриба авай хирург алай вахтунда Та­тарстанда машгьурбурукай сад я. Лезги духтурдин пешекарвилин, хъсан ерийрин, алакьунрин гьакъиндай адан тlварцlихъ Интернетда кхьизвай алхишдин келимайрини шагьидвалзава.

“Лап хъсан пешекар я. Ада са затlни фикир тагана тазвач. Герек хьайитlа, гила анжах Тажидин Азимовичан патав фида”, — кхьизва са агьалиди духтурдин гьакъиндай.

“Зи фикирдалди, Тажидин Азимовича гайи меслятар, теклифар менфятлубур я. Духтурдин пешекарвал ва ада азарлубурухъ галаз рафтарвалзавай тегьер заз бегенмиш хьана. Ада вичи ахтармишна, талукь тир теклифарни гана. Сагърай вич!”, — кхьизва Татарстан Республикадин са агьалиди.

Т.Гьамидов хирургиядинни проктологиядин месэлайрай важиблу илимдин 9 кlва­лахдин автор, Къазан шегьерда проктологиядин хилен бине эцигайбурукай сад я. Къанни вад йисан къене ада шегьердин азарханадин проктологиядинни хирургиядин отделенидин заведующийвал авуна. Къазандин проктологиядин къуллугъдин кьилин проктолог яз кlвалахиз, ада вичин вири чирвилер, тежриба сагъарунин и жуьре вилик тухуниз бахшнава.

Машгьур ватанэгьлидихъ къуй мадни чlе­хи агалкьунар хьурай!

Гьазурайди — Куругъли Ферзалиев