19-апрелдиз Дербентда, СтIал Сулейманан тIварцIихъ галай Лезги театрда, гьар йисуз гузвай халкьдин милли «Лезги гъед» премия вахкуниз талукьарнавай мярекат кьиле фена. Ана РД-дин Гьукуматдин Председателдин заместитель Нариман Абдулмуталибова, милли сиясатдин ва диндин крарин рекьяй министр Энрик Муслимова, ФЛНКА-дин регьбер Васиф Гьасанова, депутатри, илимдин, яратмишдай, жемиятдин интеллигенциядин, патарихъай хтанвай чи халкьдин машгьур векилри ва масабуру иштиракна.
Къейд ийин, халкьдин милли «Лезги гъед» премия лезгийрин милли медениятдин федеральный дережадин автономияди (ФЛНКА) арадал гъана, къадим шегьерда мярекат кьиле тухвайдини гьа и тешкилат я.
Сятдин вад. Тамашачийри залда чкаяр кьунва. Сегьнедин лацу пердедилай «Лезги гъед» премия гунин къарар кьабулайвал рикIел хкизвай видеороликдай залдиз машгьур диктор Руслан Шайдаеван ван чкIизва: «Лезги гъед. Машгьур, садазни ухшар авачир, вичин тарих агъзур йисарин деринриз физвай, муьжуьд кIвенкI алай гъетрен-гамунин нехиш. Асирралди Кьиблепатан Дагъустанда гамар хурунин устIарвал халкьдин сеняткарвилин арада кьилинбурукай сад тир. И гамарай, гуьзгуьдай хьиз, чи хайи чилин къадим, надир, масабуруз ухшар тушир руьгьдин меденият аквазва. Лезги гъед вири Кавказдин медениятдин ирс ва сеняткарвилин кьилин лишанрикай сад я. И надир нехиш алаз гъили хразвай гуьрчег гамар кIвалерин, музейрин ва антиквариатрин кIватIалрин халисан дамах я.
«Лезги-стар» — ихьтин тIвар алаз абур дуьньяда машгьур я. Лезги гъед Росcиядин ва маса шегьеррин музейрани къалурнава. Абурун арада Эрмитаж, Нью-Йоркда авай метрополитен, Лондонда авай Альбертанни Викториядин музеяр ва масабур ава.
Ажайиб кар туш: Лезги гъед ФЛНКА-ди вичин 25 йис тамам хьун къейд авур йисуз арадал гъайи халкьдин премиядин лишан хьана…».
Мярекат кьиле тухузвай Владик Батманова ва Гуьзел Къадировади, 2025-йисан «Лезги гъед» премиядин сагьибар малумардалди, ФЛНКА-дин регьбер Васиф Гьасановаз гаф гана:
«Ассаламалейкум, гьуьрметлубур. Куьн атуй, рагъ атуй! ЧIехи шаир СтIал Сулейманан тIварцIихъ галай театрдин гуьрчег залда къе чи халкьдин вилик-кьилик квай рухваярни рушар кIватI хьанва. Себебни кутугайди я. Кьве йис вилик ФЛНКА-дин советдал чна чпин зегьметдалди, алакьунралди, вафалувилелди чи халкь викIегьарзавай, чи меденият, вилик тухуз, девлетлу ийизвай, чи тарих мадни гужлу ийизвай ксариз халкьдин «Лезги гъед» премия гудай къарар кьабулна. Халкьдин «Лезги гъед» премия лезги чилин алакьунар авай рухвайризни рушариз ийизвай икрам я. Абуру чпин чешнедалди несилрик руьгь кутазва. Заз квез виридаз сагърай лугьуз кIанзава. Аллагьди хуьрай куьн!».
Вичин рахунрилай гуьгъуьниз Васиф Гьасанова Дагъустандин Гьукуматдин Председателдин заместитель Нариман Абдулмуталибовав гьакъисагъ зегьметдай ва медениятни жемият вилик финик чIехи пай кутунай «Лезги халкьдин вилик лайихлувилерай» медаль вахкана.
Межлис кьиле тухузвайбуру мярекатдин иштиракчийриз ФЛНКА-дин советдин председатель Ариф Керимовани РД-дин Гьукуматдин Председателдин заместитель Заур Эминова ракъурнавай тебрикдин чарар кIелайдалай кьулухъ алай йисуз халкьдин премиядиз лайихлу хьанвай ксарин тIварар малумарна.
Абурун жергеда тарихдин илимрин доктор Замир Закарияев, Дагъустандин халкьдин шаир Пакизат Фатуллаева, Филерин хуьруьн мектебдин лезги чIаланни эдебиятдин муаллим Ханпери СултIанова, Ахцегьрин тарихдинни краеведенидин музейдин кьил Агьмед Дагъларов, «Кьиблепатан Дагъустандин чIехи тарих — инсанрин тIварара» проект арадал гъанвай Али Албанви, «Лекьрен муг» тIвар алаз сад лагьай лезги милли лагерь арадал гъайи Садикь Гьасанов, Гьажи Давуд Муьшкуьрвидиз бахшнавай мемориалдин комплекс эцигдай теклиф гайи ва и кар кьилиз акъудай Фетали Мейланов, PubIic Dictionary арадал гъанвайбурун десте (Заур Агъамов, Александр Алибутаев, Саид Азизов), «Lezgifood» проектдин автор Нарима Агьмедова, «Сувар» ансамблдин манидар Жавагьир Абдулова авай.
Шабагьар вахкунин арайра республикадин ва Кеферпатан Кавказдин конкурсрин гъалибчи Залике Шихмурадовади роялдал Готфрид Гьасанован «Токката» эсер тамамарна кьуьлердай аялрин «Кавха» ансамблди (регьбер — Сефербег Сефербегов) «Мел» ва шегьердин «Гуьнеш» ансамблди зарб кьуьлер авуна, музыкадин училищедин хорди (дирижер — Мевлуьдин Хайиров) халкьдин «Бала» ва «Махпур», «Элегия» ансамблди (регьбер — Наиля Шихмурадова) «Чизвачир заз» манияр ва Решад Ибрагьимова, Наира Рагьмановади, Жавагьир Абдуловади чпин манияр тамамарна.
Къагьриман Ибрагьимов
