ЦIийи йисан конкурсар
Алукьнавай йисуз ЧIехи Гъалибвилин 75 йис тамам жезва. Гьаниз килигна, Россиядин Президент Владимир Путинан къарардалди 2020-йис РикIел хуьнин ва баркаллувилин йис яз малумарнава. Ватандин азадвал патал чан эцигай Игитар, мусибатдин дяведа гъалибвал са-са камуналди мукьва авун патал зурба зегьмет чIугур далу патан фронтдин зегьметчияр рикIел хкун ва хуьн, абурун баркаллу краралди жегьил несилар тербияламишун, тарихда хьайи вакъиайрикай дуьз нетижаяр хкудун, рехъ гайи гъалатIар тикрар тахвун — РикIел хуьнин йис малумарунин асул метлеб гьа и месэлайрикай ибарат я лагьайтIа жеда.
Вичин нубатдай «Лезги газетдини» винидихъ лагьанвай месэлайриз талукь конкурс малумарзава. Пуд чкадикай ибарат тир и конкурсдин премийрин кьадар виликдай хьиз амукьда: 3000 манат, 2000 манат, 1000 манат.
Алукьнавай йис чун патал мад са важиблу вакъиадалди лишанлуди я: хайи чIалалди публицистикадин диб кутур, халкьдин савадлувилиз ишигъ гузвай чирагъ хьайи “Лезги газетдин” 100 йис тамам жезва. Гьаниз килигна, и йисуз чна газетдин юбилейдиз талукьарнавай конкурсни малумарзава. Къейд ийин, ам жаванар ва жегьилар фикирда кьуна малумарнава. Асул шартIарикай сад лезги публицистикадин эсерар теснифуникай ибарат я. Кьилди къачуртIа, ихтилат халкьдин яшайишдиз, дуланажагъдиз талукь важиблу месэлаяр къарагъаруникай, жезвай вакъиайриз дуьз къимет гуз алахъуникай (ва икI мад) физва. И конкурсни пуд паюникай — пуд премиядикай ибарат жеда.
Сад лагьайди — 3000 манат ва диплом — “Лезги газетдикай” лап хъсан очерк кхьинай, кьвед лагьайди — 2000 манат ва диплом — лап хъсан гьикая кхьинай ва пуд лагьай премия — 1000 манат ва диплом — хъсан шиир кхьинай гуда. Текстинин кьадар 4 чарчелай артух ва шииррин кьадар 5 бендинилай тIимил тахьун лазим я.
Алатай йисара хьиз, чна юмординни сатирадин куьруь жанрайрин “ИкIни жеда кьван” ва уьмуьрдин рехнеяр арадай акъудиз куьмек гузвай “Хъсан шикил” конкурсарни давамарзава. И конкурсра гъалиб хьайибуруз гьардаз 1000 манат премия ва дипломар гуда.
“Гьевес кутадай премия” — 1000 манат ва диплом — са шумуд касдивай къачуз жеда. И кар патал хайи газетдин чинал жуьреба-жуьре хци месэлайрай кьил-кьилел алай макъалаяр гъана кIанда.
Идалайни гъейри, литературадихъ, чIалан къешенгвилихъ галаз алакъалу жаванрин ва жегьилрин арада бажарагълубур хкягъунин мураддалди малумарнавай пуд премияни къуватда ама.
Сад лагьайди — виридалайни хъсан гьикаядин эсер (кьадар вини кьил пуд чарчелай артух тушиз, А4 форматдин чар, 14 кегль, 1,5 интервал). И конкурсда чпин яшар 40 йисалай виниз туширбурувай иштиракиз жеда.
Кьвед лагьайди — Дагъустандин вузрани колледжра кIелзавай лезги студентрин арада “Виридалайни хъсан очерк” кхьинай (кьадар вини кьил пуд чарчелай артух тушиз, А4 форматдин чар, 14 кегль, 1,5 интервал). Тема ачухди я.
Пуд лагьайди — мектебра кIелзавай аялрин арада “Виридалайни хъсан шиир” кхьинай. Тема ачухди я.
Конкурсрин гъалибчийрин агалкьунар пулдин премийралди (1-чка -3000 манат, 2-чка — 2000 манат ва 3-чка — 1000 манат) ва «Лезги газетдин» дипломралди лишанламишда.
РикIел хкин: конкурсдиз ракъурзавай макъалаяр басма авунвай кьуд чарчелай чIехибур хьун лазим туш. Макъалайрин кьилел конкурсдин тIвар кхьин чарасуз я.
Эхирдайни чаз “Лезги газетдин” конкурсра гъалиб хьанвай вири юлдашриз агалкьунар тебрикиз, чахъ галаз алакъа хуьзвай мухбирриз, чаз кхьизвай гьар са касдиз мад сеферда рикIин сидкьидай чухсагъул лугьуз кIанзава. Къуй куь илгьамдин чешме мадни дерин хьурай!
«Лезги газет»
