31-январдиз «Лезги газетдин» кьилин редактор Мегьамед Ибрагьимова Махачкъала шегьердин мектебра лезги чIалан тарсар гузвай са шумуд муаллимдихъ галаз гуьруьш кьиле тухвана. Абурун арада 40-нумрадин юкьван мектебдин муаллим Мариян Бугаева, 48-нумрадин мектебдин муаллим Шукуфат Хибиева ва 59-нумрадин мектебдин муаллим Оксана Чубанова авай.

Гуьруьшдин сергьятра аваз иштиракчийри «Лезги газетдин» редакцияди гьар йисуз лезги чIалай тешкилзавай олимпиададиз талукь месэлаяр веревирдна.

ЦIи олимпиада 19-февралдиз Махачкъаладин 59-нумрадин юкьван мектебда кьиле тухудайвал я. Мярекат экуьнин сятдин 10-даз гатIунда. Олимпиадада Махачкъала ва Каспийск шегьеррин юкьван мектебра 7-классра кIелзавай аялри иштиракда. Гьар са мектебдай – 1 аялди.

Олимпиададин гъалибчийриз пулдин премияр, дипломар ва ктабар гуда: 1-чка – 5000 манат, 2-чка – 3000 манат, 3-чка – 2000 манат. Дипломриз кIвенкIвечи чкаяр кьур аялрин муаллимарни лайихлу жеда.

Олимпиададин тапшуругъар Докъузпара райондин Къалажухрин хуьруьн юкьван мектебдин дидед чIалан муаллим, «Лезги газетдин» хсуси мухбир Куругъли Ферзалиева гьазурзава. Олимпиададин иштиракчийри тамамарай кIвалахриз къимет «Лезги газетдин» кьилин редактор Мегьамед Ибрагьимова гуда.

Къейд ийин хьи, «Лезги газетдин» редакцияди ихьтин мярекат кьиле тухуз цIи кьвед лагьай йис я. Сад лагьай олимпиада шаз Кьурагь райондин КIирийрин хуьре кьиле фенай.

И мярекат хайи чIалан Международный йикъан (21-февраль) сергьятра аваз тешкилзава. Лезги чIалай олимпиада кьиле тухунихъ са шумуд метлеб ава: акьалтзавай несилдин векилар руьгьдин ивирриз мукьва авун, хайи чIал хуьн ва ам вилик тухун, алакьунар авай аялар винел акъудун…

«Лезги газет»