Играми дустар! Гьуьрметлу ватанэгьлияр, лезги чIалан къадир авайбур!
2020-йисан 10-октябрдиз, кьвед лагьай сеферда яз, “Лезги диктант” лишандик кваз савадлувилин международный серенжем кьиле тухузвайдакай хабар гузва. И югъ халкьдин календарда сувар — Лезги чIалан югъ яз гьатнава.
“Лезги диктант — 2020” серенжем чи халкьдин кьилин газет, Дагъустандин милли печатдин кIвенкIве жергейра авай издание тир “Лезги газетдин” 100 йисан юбилейдиз талукьарзава.
Мурадар, макьсадар, дегиш тахьана, гьа авайвал амукьзава:
— дидед чIал чирунин кIвалах, медениятдин ивирар машгьур авун; орфографиядин ва пунктуациядин жигьетдай савадлу хьун; СМИ-рин ва жемиятдин фикир чIал чирунин, чеб ишлемишунин сергьятар гуьтIуь жезвай чIалар хуьнин месэлайрал желб авун;
— диктантдин нетижаяр веревирд авуналди ва ахъаяй гъалатIриз баянар гуналди, савадлу авунин дережа хкажун;
— милли къанажагъ, дидед чIалал амал авунин гьисс мягькемарун;
— жува жуван чирвилер хкажуниз, савадлувал артухаруниз итиж авунин кIвалах ашкъиламишун.
“Лезги диктант — 2019” лишандик кваз кьиле тухвай серенжем эхиримжи цIуд йисара чи халкьдин тарихда савадлувилихъ галаз алакъалу жемиятдин лап чIехи мярекатдиз элкъвена. Ада, къуватар сад авурла, чавай гьикьван гзаф крар кьилиз акъудиз жедатIа, гьа кар успатна.
Алай йисуз COVID-19 чукIунихъ галаз алакъалу яз арадал атай лап къулайсуз шартIари жемиятдин уьмуьрдин вири терефрик тайин тир дегишвилер кутуна. Арадал атун мумкин тир хаталувилер ва цIийи гьалар фикирда кьуналди, Тешкиллувилин комитетди 2020-йисуз винидихъ тIвар кьунвай серенжем кьиле тухудайла, онлайн къайдадиз асул фикир гун къарардиз къачунва.
Гьа са вахтунда лугьун герек я хьи, теклифзавай серенжемда гьар садавай дуьньядин гьи пипIе аваз хьайитIани, иштирак ийиз жеда — и кар патал интернетдик кутаз жедай электронный алат (компьютер, планшет, смартфон) гъилик кваз хьун бес я. Гьа икI, алай йисуз диктант лезги чIалал рахазвай агьалияр бинеламиш хьанвай дуьньядин вири уьлквейра кьиле фин мумкин я. И кар авун патал https://Lezgidiktant.ru сайтдиз гьахьун (ам и йикъара кардик акатда) ва регистрация авунин са акьван четин тушир кIвалахда иштирак авун бес я.
Идахъ галаз сад хьиз, гьа цIинин йисузни оффлайн — майданрикай менфят къачун тавуна амукьдач. Лезги диктант Кьиблепатан Дагъустандин муниципальный районрин школайра кьиле фида. Гьа и вахтунда тIугъвалдикай хуьн патал чарасуз вири серенжемар кьабулда.
Тешкиллувилин комитетди теклифзавай серенжемда активдаказ иштиракуниз эвер гузва ва къведай йисуз чавай диктант кьиле тухунин лап тамам, дуьзгуьн къайдадал элячI хъийиз хьуник умуд кутазва.
Тешкиллувилин комитет лезги чIалал кьиле тухвай, вирибур патал тир международный диктант кхьинин карда (октябрь, 2019-йис) иштирак авур вири ксари вичин тIварцIихъ ракъурай теклифрихъ, майилвилерихъ галаз таниш хьана ва умумиламишайдалай гуьгъуьниз абур, лезги чIал хуьн ва вилик тухун патал мумкин тир серенжемар кьабулдайвал гьукумдин вири дережайрин къурулушриз рекье твазва:
— Россияда ва Азербайжанда лезги чIалан векилар битавдаказ яшамиш жезвай мулкара лезги чIалал тарсар гунин ери хъсанаруниз, школайрин расписанийра лезги чIалаз чара ийизвай сятер артухаруниз датIана куьмек гун; лезги агьалияр битавдаказ яшамиш жезвай районра пешекар кадрияр — лезги чIалан ва литературадин муаллимар гьазурун патал дуьзгуьн шартIар яратмишун;
— чпин тарихдин ватандин сергьятрилай къеце яшамиш жезвай аялар ва яшар тамам хьанвайбур патал чIалан курсар, кружокар, гьяд йикъан школаяр тешкилунин барадай гузвай теклифрин тереф хуьн;
— кириллицадал бинеламиш хьанвай лезги литературадин чIалан садвал хуьниз куьмек гун. Эпидемиологиядин жигьетдай арадал атанвай муракаб гьалар ва чIехи серенжемар кьиле тухудай чIавуз идахъ галаз алакъалу яз арадал атун мумкин тир къурхулувилер фикирда кьуналди, Тешкиллувилин комитетди “Лезги диктант” 2020-йисан 10-октябрдиз онлайн кIалубда аваз кьиле тухун къарардиз къачунва.
Гьуьрметдивди, Тешкиллувилин комитетдин членар.
