Алай йисан 17-сентябрдиз “Сулейман-Стальский район” муниципальный райондин кьил Нариман Абдулмуталибован председателвилик кваз кьиле фейи совещанидал районда Лезги чIалан югъ кьиле тухунин месэладиз килигна.
РикIел хкин: 2019-йисан 17-июндиз райондин депутатрин Собраниди “Лезги чIалан югъ — райондин милли сувар” тухунин гьакъиндай къарар кьабулнай. Адан бинедаллаз гьар йисуз, 10-октябрдиз районда Лезги чIалан югъ къейдда.
Мярекатдал и месэла гьялунин карда райондин администрациядин кьилин 1-заместитель Лацис Оружева, райадминистрациядин крар идара ийизвайди тир Рамазан Абдулазизова, культурадин отделдин начальник Майрудин Бабаханова, РУО-дин начальникдин везифаяр тамамарзавайди тир Гьуьсейн Шихбабаева, къуллугърин подразделенийрин, общественный тешкилатрин, яратмишдай интеллигенциядин, массовый информациядин такьатрин векилри иштиракна.
Райондин кьил Нариман Абдулмуталибова лагьайвал, 2019-йис ООН-ди бинелу халкьарин чIаларин йис яз малумарнава, гьавиляй районда цIи сифте яз Лезги чIалан югъ тухун лишанлу вакъиа жеда.
Райондин культурадин отделдин начальник Майрудин Бабаханова ва рахай маса юлдашри къейд авурвал, и йикъан мярекатрин пландик илимдин, культурадин, литературадин, искусстводин общественно-политический деятелрихъ галаз гуьруьшмиш хьунар, “Зи лезги чIал” темадай школьникри сочинение кхьинай, хуралай шиирар кIелунай, “Зи хайиди тир ва кIани ватан” лишандик кваз шикилар чIугунай конкурсар, чIалан месэлайриз талукьарнавай классрин сятер, ачух тарсар тухун, шаир Седакъет Керимовадин “Чун лекьер я” шиир устаддиз хуралай кIелун, образованидин идарайра выставкаяр акъудун, хайи ватандин тарих халкьдин яратмишунар, чир хьунай хизанрин командайрин арада конкурсар тухун, лезги писателрин ктабрин выставкаяр тешкилун, тотальный диктант кхьин… маса крар ква.
Хазран Кьасумов
