Хайи чIал ва литература чи мектебра чирзавай пешекарар къвердавай тIимил жезвайдакай, чIал ва литература чирунин методика, учебникар, хрестоматияр куьгьне ва кьит хьанвайдакай виридаз хабар ава. Гьавиляй чун хайи чIал хуьник, ам саламатдиз акьалтзавай несилрал агакьаруник пай кутаз алахъна кIанда.
Алай вахтунда мектебар акьалтIарнавай аялрин вилик кар алай месэла акъвазнава: тайин са рекьяй пешекарвал къачун патал кIелунар давамарун. Чна лезги аялриз ДГУ-дин филологиядин факультетдин Дагъустандин ва урус чIаларин (РДО) отделенидик экечIун теклифзава.
ДГУ-дин филфакдин лезги отеленидиз документар кьабулун патал урус чIалай, математикадай гъейри, урус литературадайни ЕГЭ вахкана кIанда.
Очно кIелиз кIанзавайбурун документар 20-июндилай кьабулда, са экзамен (тестирование) лезги чIалай жеда.
Заочно кIелиз кIанзавайбурун документар июлдин вацра кьабулда, са экзамен (тестирование) дидед чIалай августдин сифте кьилера жеда.
ДГУ-дин филфакдин лезги отделенидик акатай студентриз пуд стипендия (кьвед университетдин, сад Сулейман-Стальский райондин администрацияди) гуда, яни гьар са студентди 8000 манатдилай артух къачуда. Лап хъсан кIелзавайбуруз (отличникриз) йисан эхирдай 40-60 агъзур манат премиярни гуда.
Лезги чIалални литературадал, урус чIалални урус литературадал рикI алай жегьилриз ДГУ-дин филфакдин лезги отделенидиз кIелиз ша лугьузва!
Ина чирвилер къачур пешекарривай неинки мектебра муаллимар яз, гьакI государстводин маса идарайрани, иллаки газетринни журналрин редакцийра, радиода ва телевиденида, культурадин маса хилерани кIвалахиз жеда.
«Лезги газет»
