Мергьяматлувал
Республикада коронавирус себеб яз четин гьалар арадал атай макъамда мергьяматлувилин “ЛЕКИ” фондунини хейлин кIвалахар кьилиз акъудна.
Гзаф ватанэгьлийрин гьал-агьвал авайдалай пис хьунин гьакъикъат фикирда кьуналди, майдиз “ЛЕКИ” фондуни ФЛНКА-дихъ галаз санал гьар йисуз кьиле тухузвай ифтардин чкадал цIи хсуси такьатрихъ Дагъустандин эменни тIимил авай хизанриз недай суьрсетар паюнин къарар кьабулна.
Мергьяматлувилин серенжемдиз шериквал авур гьар са ватанэгьлидин къайгъударвал себеб яз, дарда авай 1300 хизандив санлай 15 тонн недай суьрсетар агакьарна. Кьилди къачуртIа, серенжем Кьиблепатан Дагъустандин районрин, Дагъустандин Огни шегьердин турпагъра кьилиз акъудна. Тешкилатрин активистри къейдзавайвал, тIугъвалдин шартIара суьрсетар чкайрал агакьарунин карда гуьгьуьллувилелди зегьмет чIугурбур халисан ватанпересар ва кьегьалар я.
Июндин сифте кьилера «ЛЕКИ» фондуни коронавирусдикди начагъ хьанвай 100 кас сагъар хъийидай дарманар, 17 литр кислороддин баллонар, гзаф сеферра ишлемишдай кислороддин хъуьцуьганар (40 литр) маса къачуна. Санлай къачурла, зарбачийри маса ватанэгьлийрин куьмекарни галаз и затIар къачун патал 800 агъзур манатдилайни гзаф пул кIватIна. Кьилди къачуртIа, и жигьетдай куьмекар Мегьарамдхуьруьн, Докъузпара, Ахцегь, Рутул, Сулейман-Стальский, Кьурагь ва Хив районрив агакьна.
Ихтилат физвай фондунин векилри милли меденият вилик тухунин макьсаддалдини гзаф крар кьилиз акъудзава. Хъсан серенжемрик кьил кутазвай ватанэгьлийриз баркалла!
«Лезги газет»
