Бизнесменар тир Абдулжелил Абдулкеримов ва Марат Шайдаев Rydakov Prize международный премия гудайбурук кутунва. Идан гьакъиндай “Дербент” РИА-ди хабар гана.
Ихтилат школадин ва школада кIелдай вахтунилай вилик квай яшдин къурулуш вилик тухуник ва цIийи хъувуник лап еке пай кутур меценатрикай физва, хабар гузва Forbes-ди.
Ахцегь райондин Хуьруьгрин хуьруьн агьали А.Абдулкеримова хайи хуьре 2018-йисуз аялрин просвещенидин Lumminary центр ачухуник кьил кутуна. Бизнесмен “Трастком” инвестиционный компаниядин иеси я.
“Село” фонд тешкилайбурукай сад тир М.Шайдаева 2016-йисуз хайи хуьре — Сулейман-Стальский райондин Цмурдал алай аямдин школа, гьакIни муаллимар патал яшайишдин кIвалер эцигна. Къейд ийин хьи, М.Шайдаева “Село” фондуна вичин амадаг тир Sderdank Private Banking-дин руководитель Евгения Тюриковадихъ галаз санал майдандиз экъечIна.
Премия къачун патал арзаяр вугай ксарин кьадар 460-дав агакьнава. Абур 40-далай гзаф государствойрин агьалияр я.
Гъалиб хьайи пуд касдин тIварар 2-февралдиз Москвада гала-вечердал малумарда ва гьа юкъуз абурув шабагьар вахкуда. Rydakov Prize-дин премиядин фондунин кьадар 1,2 миллион доллар я. Гъалиб хьайи кьве касди гьар сада 100 агъзур доллар къачуда, гран-придин иесиди лагьайтIа, школа ва образованидин организация тешкилун патал макьсаддин са миллион доллар къачуда. И пулуникай гъалибчиди 100 агъзур доллар вичиз кIандай рекьериз ишлемишда.
Rydakov Prize премия школада кIелдай вахтунилай вилик квай яшдин ва школадин образование цIийи хъувуник вичи кьил кутуналди еке пай кутур инсанар жемятдиз раижун патал тешкилнавайди я.
«Лезги газет»
