Республикадин диагностикадин центрадин (РДЦ) пресс-къуллугъдай чаз хабар гайивал, алатай йисуз кьиле тухвай Вирироссиядин дережадинди тир конкурсдин нетижайралди РДЦ-да духтур-лаборант яз зегьмет чIугвазвай чи ватандаш Римма Абдулагъаевна Ферзилаевадикай “Россиядин виридалайни хъсан духтур-лаборант” номинациядин призер хьана. Ам высший категориядин духтур, РД-дин здравоохраненидин отличник, Дагъустандин лайихлу духтур я…
Р.Ферзилаевади тIвар кьунвай центрада 25 йисалай виниз кIвалахзава. Виликдай ада Липецкда, Москвада ва Махачкъалада эндокринологиядин диспансерда зегьмет чIугуна. Тежриба хкажунин мураддалди ам маса шегьеррани хьана. Къенин юкъуз Римма Абдулагъаевна тежрибалу пешекар, вичин кIвалахдин устад я. Ада лабораториядин гормонрин анализрин отделда кIвалахзава. Р.Ферзилаевадин гафаралди, коллективда чпин кIвалах хъсандиз чизвай, виниз тир дережа авай пешекарри зегьмет чIугвазва.
Р.Ферзилаевади рикIел хкизвайвал, ам и центрада сифте кIвалахдив эгечIайла, ина анжах 15 жуьредин анализар ийизвай. Къе лагьайтIа, абурун кьадар кьве сеферда артух хьанва…
Духтурвилин пеше адаз гъвечIи чIавалай хуш тир. Гьеле мектебда кIелзамай аял яз, дидедин кефи чIур хьайи дуьшуьшра рушан рикI дар жедай. Гьа вахтунда ада вичикай духтур хьун кьетIна. Мединститутдиз физ хьанач. 1975-йисуз ада ДГУ-дин биологиядин факультетдиз документар вугана. Амма кьисмет масад хьана — адан чирвилер медицинада лазим атана. Римма Абдулагъаевнади и пеше хкяна лагьана гьайиф чIугунач.
— Чпихъ къени ниятар авай, сад хьтин фикиррал алай инсанрин юкьва кIвалахун иллаки хуш кар я. Гзафбурун къилихдин хъсан ерияр четин вахтунда ачух хьана. Дугъриданни, 2020-йис четинди тир, — рикIел хкизва пешекарди. — ТIугъвалдин девирда отделенида кIвалах къалин хьанвай, виридал азаб акьалтнавай. Чна 6 касдин чкадал анжах пуда кIвалахзавай. Амайбур азарлу тир. Чна сада-садаз куьмекзавай. Чун гьар сад четинвилер алудиз алахънавай. Къуватар сад авурла, чалай вилик эцигнавай везифаяр кьилиз акъудиз алакьна.
Чи мурад яргъал йисара вичин везифаяр намуслудаказ кьилиз акъудзавай Римма Абдулагъаевнадихъ чандин мягькем сагъвал, руьгьдин кIубанвал ва рикI алай пеше давамардай къуватар хьун я.
Рагнеда Рамалданова
