Ахцегь райондин Гъуьгъвезрин хуьре алай йисан майдиз армрестлингдай Дагъустандин жегьилрин Кубок-2022 кьиле фида. Гъуьгъвезрин юкьван мектебдин директордин заместитель Исамедин Шагьэмирова чаз хабар гайивал, тешкилзавай акъажунриз ахцегьви Нариман Гъазалиева къаюмвал ийида.
Гъилерин къуватар алцумунин акъажунра гъалиб хьайи командадиз махсус Кубок, заланвилин 5 дережада гъалиб хьайибурузни хъсан чкаяр кьурбуруз виридаз пулунин пишкешар гуда.
“Нариман Гъазалиев Кьиблепатан Дагъустанда жегьилрин спорт еримлу авунин рекье алакьдай вири жуьредин куьмекар гуз гьазур я. Инанмиш я, армрестлингдай майдиз кьиле фидай турнир Дагъустанда спортдин лап хъсан мярекатдиз элкъведа. Чна Махачкъаладай, Каспийскдай ва маса шегьеррайни районрай жаван спортсменар атун вилив хуьзва. Гьар райондай, шегьердай заланвилин гьар са дережада са касди иштиракун шартI я”, — ихтилатна И.Шагьэмирова “ЛГ”-дин корреспондентдиз.
«Лезги газет»
