“РусГидро” ПАО-ди вичин идараяр авай регионриз, коронавирусдихъ галаз женг чIугун патал, 100 миллион манат рекье твазва. И пул медицинадин идарайриз лазим тадаракар, инсан хуьдай, инфекция рекьидай шейэр, дарманар маса къачуниз ва коронавирусдин азар чукIунин вилик пад кьун патал кьиле тухузвай серенжемриз харжда, хабар гузва РусГидродин пресс-къуллугъди.
Талукь тир къарар, хабар гузвайвал, “РусГидро” ПАО-дин Директоррин советди алай йисан 3-апрелдиз кьабулнава. Советди идарадин 2020-йисан мергьяматлувилин ва спонсорвилин кIвалахдин дегишвилер кухтунвай Программа тестикьарнава. Абурун бинедаллаз, Дальний Востокдин федеральный округдин регионриз куьмек патал 50 миллион манат ва “РусГидро” ПАО-дин идараяр авай Европадинни Сибирдин мулкарал алай регионризни 50 миллион манат рекье тун кьетIнава.
Алай вахтунда “РусГидро” ПАО-ди вичин идараяр авай субъектрин здравоохраненидин организацияр патал ИВЛ-дин аппаратар ва медицинадин идарайрин къуллугъчияр азардикай хуьн патал лазим такьатар маса къачунин рекье вири чалишмишвилер ийизва.
Коронавирусдин аксина женг чIугун патал такьатар чара авунин къарардихъ галаз санал “РусГидро” ПАО-ди идалай вилик кьабулнавай мергьяматлувилин программа тамамаруникни тади кутунва. Адан сергьятра авазни компаниядин филиалар авай 28 региондин медицинадин, яшайишдин идарайриз, мергьяматлувилин фондариз финансрин куьмек гуда.
Идалай вилик хабар гайивал, РусГидроди винидихъ чпикай лагьанвай регионрин медицинадин, аптекайрин идараяр атIунар авачиз ва дурумлудаказ электроэнергиядалди таъминарунин месэла кьетIен гуьзчивилик кутунва. КьетIен фикир гьакIни агьалияр сотовый алакъадалди ва интернетдалди таъминардай объектар, логистикадин чIехи центраяр, алишверишдин тешкилатар ва туьквенар электроэнергиядалди таъминарунин месэладиз гузва. Идалайни гъейри, 2020-йисан 1-апрелдилай “РусГидро” ПАО-дин ресурсралди таъминардай компанийри вири жуьре муьштерияр электроэнергиядин, кIвалера чимивилин ва кузвай цин гьакъи тагайла илитIзавай жермедин серенжемрикай (пенядикай) са вацран вахтунда азадда.
Агьалияр дурумлудаказ чимивилин энергиядалди таъминарунин чарасузвал фикирда кьуналди, РусГидроди энергохолдингдин карханайра кIвалахзавай пешекаррин арада короновирусдин инфекция чукIун тавун патал лазим серенжемрин кьадар гегьеншарнава. “РусГидро” ПАО-дин исполнительный аппаратда, вири филиалра ва идарадин къаюмвилик квай тешкилатра оперативный штабри кIвалахзава. Абуру тIегъуьндихъ галаз алакъалу гьаларал датIана гуьзчивалзава ва и жигьетдай государстводин талукь органрихъ галаз алакъада аваз кIвалахзава.
Идарадин офисрин 80 процент пешекарар яргъал мензилда аваз кIвалахдай къайдадал алуднава. Энергообъектрин къуллугъчийри сменайрин къайдада кIвалахзава, кьетIен гьалар арадал атун мумкин тирди фикирда кьуна, “михьи” сменаяр тешкилнава. Къуллугъчийрин сагъламвал хуьдай серенжемарни кьабулнава: компаниядин къуллугъчийрин бедендин ифиндал гуьзчивалзава, инфекциядикай хуьдай такьатар ишлемишзава, офисрин ва производстводин чкаяр гьар юкъуз чуьхуьзва, михьзава, гьава михьи ийидай системаяр ишлемишзава.
Серенжемар мадни кIеви ийидай игьтияж арадал атайтIа, РусГидродин карханайрихъ къецепатакай тамамдаказ атIана кIвалахдай мумкинвал хьун патал лазим рекьер жагъурзава.
Амина Муслимова
