Чна лайихлу муаллимрикай, духтуррикай, хуьруьн майишатдин работникрикай ва икI мад газетдиз  датIана макъалаяр гузва. Амма яргъал вахтара банкарин къурулушда кIвалахзавайбурукай лап кьериз-цIаруз кхьенва. И нукьсан арадай акъудунин мураддалди и йикъара зун фадлай и къурулушда зегьмет чIугвазвай АО АКБ  “Эльбин”  банкдин  правленидин председателдин заместитель  Бейбала  Гьажибалаевич  Велиевахъ  галаз гуьруьшмиш хьана.

Бейбала 1958-йисуз Азербайжан ССР-дин Къуткъашен райондин Амирван хуьре колхозчияр тир Гьажибаладинни Гуьлевшадин хизанда дидедиз хьана. 1929-1930-йисара, Дагъустандин гзаф маса хуьрерай хьиз, Европада виридалайни кьакьанда авай Къурушрин хуьряйни гзафбур, гьа жергедай яз Велиев Гьажибаладин хизанни, Азербайжандиз куьч хьана. Ана хизан малдарвилел машгъул тир. Хизанда кьве велед (са гадани руш) тербияламишна. Руш Къизил кIвалин кайвани я. Бейбалади хайи хуьре 8-классдал кьван, гуьгъуьнлай Баку шегьерда 5-нумрадин школа-интернатда кIелна. Школа куьтягьайдалай гуьгъуьниз Советрин Армиядин жергейра къуллугъна, 1981-1986-йисара ДГУ-дин экономический факультетда заочнидаказ кIелна. 1981-йисуз ада вичин зегьметдин рехъ Махачкъала шегьердин центральный сберкассада старший кассирвилелай башламишна. Гуьгъуьнлай жуьреба-жуьре йисара республикадин Гострудсберкассайрин управленида ревизорвиле, Махачкъала шегьердин 8416-нумрадин Кировский отделенидин управляющийвиле, 5022-нумрадин сбербанкдин управляющийдин сад лагьай заместителвиле, РФ-дин сбербанкдин 5022-нумрадин Дагъустандин отделенидин управляющийдин заместителвиле, ООО АКБ “Дагдорбанкдин” правленидин председателдин заместителвиле, ООО АКБ “Дагдорбанкдин” Ма­хачкъаладин филиалдин директорвиле, ОАО КБ “Анжибанкдин”  “Капитал”  филиалдин директорвиле, ОАО КБ “Эльбин” — банкдин 5-нумрадин алава офисдин руководителвиле зегьмет чIугуна. Алай вахтунда Бейбала Велиев АО АКБ “Эльбин” банкдин правленидин председателдин заместитель, РФ-дин лайихлу экономист, РФ-дин центробанкдин патай гзаф кьадар гьуьрметдин грамотайрин сагьиб я.

Бейбала Гьажибалаевичан уьмуьрдиз вил вегьейла, адахъ девлетлу биография авайди аквазва. КIвалахай вири чкайра ада вичикай анжах хъсан фикирар туна.

Банкарин кIвалахдин рекьяй дерин чирвилер ва еке тежриба авай Бейбала Гьажибалаевичан вилик за са шумуд  суал эцигна.

• Сифте заз куьне “Эльбин” банкдин та­рихдикай, адан кIвалахдикай куьрелди ла­гьанайтIа кIанзавай.

— Акционерный коммерческий банк  “Эльбин” (АО) 1993-йисуз общественно-политический машгьур диятель ва бажарагълу бизнесмен рагьметлу Гьамид Мустафаевич Гьамидова кардик кутунай, — башламишна ада вичин ихтилат. — 1993-йисуз ам РФ-дин центробанкди талукь тир къайдада регистрация авуна. 1998-йисуз банк агалнавай. 2003-йисуз ачух акционерный обществодиз элкъуьрнай. 2013-йисуз АО АКБ “Эльбин”  банкдин уставной капиталдин кьадар 310 млн манат тир. “Эльбин” банкди Россиядин банкарин къуллугъардай базарда кIвалахиз 25 йис я. И девирда ада агьалийрин гзаф игьтияжриз къуллугъна. Къенин юкъуз ам алай аямдин виниз тир технологийрин, бизнесменрин ва кьилдин ксарин къвердавай артух жезвай игьтияжар тамамарзавай чешнелу банк я. Банкдиз Москвада, Владивостокда вичин филиалар ва алава офисар ава. Регионрин банкариз ихтибарлувилин рейтингдай ам сад лагьай вад банкдин арада ава. Банкди Россиядин ва РД-дин зурба банкарихъ галаз алакъаяр хуьзва.

• Банкдин кIва­лах­дин кьилин терефар квекай ибарат я?

— Банкди агьалийриз вкладар ачухунин, пулар Россиядин ва къецепатан уьлквейриз, санай масаниз рекье тунин, валютадин операцияр кьиле тухунин, юридический ва кьилдин ксариз кредитар, карханайриз ва идарайриз гьахъ-гьисабдин счетар ачухунин ва гзаф маса къуллугъар ийизва.

• Банкда вкладрин гьихьтин жуьреяр ава?

— Пулар са шумуд жуьреда эцигиз же­да. Кьилди къачуртIа, агъадихъ галай жуьре­яр ава: вахтуналди тир вклад “Эльбин надеж­ный” (7,5%), вахт эцигнавай вклад “Эльбин пополняемый” (7%), вахтуналди тир вклад “Эльбин пенсионный” (4%), вклад (до востребования) (03%).

• Банкди агьалийриз къецепатан уьлквейрин валютадин вкладар ачухзавани?

— Эхь, Банкди муьштерийриз долларрин (0,3%), евродин (0,5%) вкладар ачухзава. Вкладрин патахъай тамам делилар “Эльбин” — банкдин официальный сайтдай чириз жеда.

• Банкди вичин муьш­терийриз Интернет технология ишлемишунин къуллугъар ийизвани?

— Гьелбетда. Операцияр кьиле тухудайла, банкди вини дережадин технологияр активнидаказ ишлемишзава. Кьилди къачуртIа, къуллугъ — муьштери — банк. И къуллугъди муьштерийриз банкда ачухнавай расчетный счетдай, вичин офисдай экъечI тавуна, Интернетдай лазим операцияр кьиле тухудай мумкинвал гузва. Идалайни гъейри, банкди пластикадин карточкаяр акъудзава, муьштерийривай а карточкадай Интернетдай, онлайн — режимда аваз, герек шейэр маса къачуз же­да. Банкдин карточкадай нагъд пул гъилиз атун патал шегьерда ва бязи районра банкоматрин сетар кардик кутунва.

• Банкдай къецепатан уьлквейрин валюта къачуз ва маса гуз жедани?

— Чи банкдай муьштерийривай валюта маса къачунин ва маса гунин операцияр кьиле тухуз жеда. Валюта маса къачунин ва гунин курс гьар юкъуз дегиш жезва. И кар валютадин базарда авай гьаларихъ галаз ала­къалу я.

• Банкдай пулар санай-саниз анжах Россияда рекье тваз жезвани?

— Ваъ. Пулар санай-саниз неинки са Россияда, гьакI инай мукьвал ва яргъал тир уьлквей­риз валютани рекье тваз жезва.

• Банкда гьукуматди агьалийрин вкладар страховатзавани?

— Эхь, 2005-йисалай банк вкладар страховатдай системадин реестрдик кутунва.

• Банкди гьихьтин ксариз ва гьикьван вахтунда кредитар гузва?

— Пуд йисалай виниз тушиз, вахтуналди 23-йисалай 69-йисал  къведалди яшара авай юридический ва кьилдин ксариз.

• Кредитдин процентдин ставка гьи­кьван я?

— Кьилдин ксариз — 19, юридический ксариз  23 процент я.

• Кредит вахтунда вахкуз тахьай дуьшуьшра куьне вуч ийизва?

— Эгер вахкуз тахьунихъ са гьихьтин ятIа­ни тайин себебар аваз хьайитIа, абур фикирда кьуна, кредитдин вахт давамарзава. Чи банкди муьштерийриз ийизвай къуллугърин кьадар гзаф я, чебни — виниз тир ери аваз. Банкдиз еке мумкинвилер хьун муьштерийриз мумкинвилер хьунилай аслу я, — къейдзава Бейбала Гьажибалаевича­.

• КIвалахзавай работникрикай вуч лугьуз жеда?

— Ина кьве вишелай виниз работникри кIва­лахзава. Абур вири кьилин образование авай, чпин пеше дериндай чидай, агьалийрин къуллугъда галатун тийижиз акъвазнавайбур я. Зун абурун кIвалахдилай гзаф рази я.

• Квел гьихьтин четинвилер гьалтзава?

— Ахьтин еке четинвилер чаз авач. Амма РФ-дин центробанкдин истемишунар къвер­да­­вай кIевибур жезва. ЯтIани чи коллективди­, чпин вири къуватар эцигна, а истемишунар на­­мус­лувилелди кьилиз акъуддайдак за умуд кутазва.

Гьар са касдиз адан агалкьунриз килигна къимет гуда. Бейбала Гьажибалаевичазни, адан инсанвилин ерийриз, гьакъисагъвилелди чIугвазвай зегьметдиз килигна, кIвалахза­вай­ коллективдин арада еке гьуьрмет ва авторитет ава.

Бейбала Гьажибалаевичахъ галаз санал кIва­лах­завай АО АКБ “Эльбин”  банкдин ав­то­­­матизациядин отделдин начальник  Алидаров  Космудина  ингье адакай вуч лугьуз­ва­тIа­:

— Бейбала Гьажибалаевич банкдин кIва­лах хъсандиз чидай  тежрибалу работник я. И рекьяй адахъ ге­гьенш, дерин чирвилер, алакьунар ава. Ам лап хъсан регьбер ва тешкилатчини я. Гьар йикъан кIвалахда ам кIеви истемишунардай, гьа­къикъи месэлаяр вилик эцигзавай, абур гьялзавай, гьахълувал кIандай регьбер я.

Бейбала Гьажибалаевич неинки тежрибалу пешекар, гьакIни гьуьрметлу хизандин кьилни я. Вичин уьмуьрдин юлдаш, Махачкъала ше­гьердин 9-нумрадин муниципиальный поликлиникадин медсестра Егане Бахтияровнадихъ галаз санал хизанда кьве хва тербияламишнава. Къе абурукай гьар сад та-риф авуниз­ лайихлу инсанар хьанва, кIвал-югъ кутуна, яшамиш жезва. Сеймур вичин хизан галаз Москвада ава, ам карчи я. Тимур Махачкъала ше­гьердин АО АКБ “Эльбин”  банкдин 5-нум­радин алава  офисдин кьиле ава.

Инсанрин игьтияжар галатун тийижиз тамамарунин къайгъуда авай гьуьрметлу Бей­бала  Гьажибалаевичаз  ва ам кьиле авай коллективдиз чна ЦIийи йис мубаракзава. Абурухъ чандин сагъвал,  кIвалахдани еке агалкьунар хьун чи мурад я.

Надият Велиева