Чи ватанэгьлияр — гьар сана
Вилик важиблу макьсадар эцигнавай, абурув агакьун патал майиллувилелди алахъунарни ийизвай, пешекарвилин рекьяй вини дережайрихъди физвай жегьил ватанэгьлийрикай сад алай вахтунда Москвадин областдин Долгопрудный шегьерда яшамиш жезвай, ана телекоммуникацийрин машгьур тешкилатда кIвалахзавай Эдгар Арсенович Къазиагьмедов я.
Ам 1996-йисан 20-июлдиз Сулейман-Стальский райондин Алкьвадрин хуьре дидедиз хьана. Ам гьеле аялзамаз диде-бубаяр Самарадиз, гуьгъуьнлай Тольятти шегьердиз куьч хьана.
Мектеб хъсандиз кIелайдалай кьулухъ Эдгар 2014-йисуз прикладной математикадин ва физикадин хиляй Москвадин физикадинни техникадин институтдик (МФТИ) экечIна. Гьа са вахтунда Тольятти шегьердин ДДЮТ-да ахтармишунрин кIвалахарни гъиле кьуна. Вуздин 2-курсуна авай чIавалай ам “Virtuozzo” тешкилатда виртуализациядин рекьяй ахтармишунин кIвалахрал машгъул хьана. Эдгара мукьвара “анализ данных” хиляй МФТИ-да магистратура куьтягьда.
Алакьунар авай жегьилди са десте студентрихъ галаз санал МФТИ-да электроникадин рекьяй онлайн-курсар тамамвилелди кардик кутуна. Сифтедай ада операционный системайрин хилени кIвалахна. Гуьгъуьнлай Эдгар Къазиагьмедова вири дуьньядин машгьур “Хуавэй” (Huawei R&D) тешкилатда пешедин рекьяй тежриба хкажун кьетIна. Къейд ийин, тIвар кьунвай тешкилат ИКТ-дин (информационно-коммуникационные технологии) рекьяй дуьньяда сифте жергеда авайбурукай я. Эдгаран чирвилер, бажарагъ ва ада пешедиз къалурзавай майилвал акурла, тешкилатдин жавабдар векилри адаз кIвалах теклифна. Гьа чIавалай эгечIна ада кьилдин ксар чир хъувунин ва нейрондин сетрин хатасузвилин хиляй кIвалахзава.
Ада илимдин конференцийра, жуьреба-жуьре конкурсра агалкьунралди иштиракзава.
Чешнелу ватанэгьлидихъ гележегда аспирантурадик экечIдай ва рикI алай пешедай илимдин дережа къачудай ният ава. Къуй адаз вичин фикирдик квай вири мурадар кьилиз акъатдай йикъар акурай!
К.Ферзалиев
