Кьасумхуьруьн Маяковскийдин, Чернышевскийдин ва Етим Эминан куьчейра къир цунин кIвалахар саки акьалтIзава.
«Лезги газетдиз» Сулейман-Стальский райондин пресс-къуллугъди хабар гайивал, 11-июлдиз куьчейра къир цунин кIвалахар кьиле физвай гьалдихъ галаз райондин кьил Нариман Абдулмуталибов таниш хьана. ТIварар кьунвай куьчеяр «Шегьердин къулай шартIар арадал гъун» программадин сергьятра аваз цIийи хъувунвай Чернышевскийдин тIварунихъ галай паркунихъ галаз алакъа авайбур я.
Райондин кьил кIвалахар кьилиз акъудзавай тешкилатдин векилрихъ ва тIварар кьунвай куьчейра яшамиш жезвай агьалийрихъ галазни гуьруьшмиш хьана.
Къейдзавайвал, Кьасумхуьруьн куьчеяр абадун райадминистрациядин кар алай месэлайрикай я. Алатай йисалай Агъа СтIалрин, Кьулан СтIалрин, Вини СтIалрин, ЦIийи Макьарин, Сардархуьруьн, Чуьхверхуьруьн ва Герейханов хуьрерин куьчейра къир цунин кIвалахар алатай йисалай гатIуннай. Алай йисуз Курхуьруьн, Алкьвадрин ва Кьулан СтIалрин куьчейра къир цадайвал я.
Алай вахтунда Етим Эминан ва Маяковскийдин куьчейра къир цанва, Чернышевскийдин куьчеда кIвалах давам жезма. Санлай къачурла, къир цазвай куьчейри 3800 кв. метрдин майдан кьазва. КIвалахар ООО «Прогресс» тешкилатди кьилиз акъудзава.
«Лезги газет»
