Механизаторвилин ва шофервилин пешеяр чарасуз герекбурук акатзава. Хуьруьн чкада абурухъ иллаки игьтияж ава. Кьасумхуьрелай тир Назим Гьажибегова шофервилин пеше къачуна, саки 20 йис я. Эхиримжи 7 йисуз ада Кьасумхуьрел кардик квай “Касумкентсервис” ООО-да шофервиле кIвалахзава, гьа сифте йикъарилай вич пешедал, техникадал рикI алай кас яз къалурзава.

— 2019-йисан 1-январдилай районда коммунальный кIеви амукьаяр кIватI хъувун цIийи къайдада тешкилнава, и кIвалах региондин операторди — “Экологи-Ка” ООО-ди кьиле тухузва, — лугьузва “Касумкентсервис” карханадин директор Гъалиб Фатагьова. — Федеральный законди ва региондин операторди карханадин вилик эцигнавай везифаяр, ийизвай истемишунарни екебур я. Гьавиляй чаз Назим Гьажибегов хьтин пешекарар чарасуз герек я. Назима вичин хиве авай везифаяр агьалияр рази жедайвал кьилиз акъудзава. Чунни адан кIвалахдилай рази я. Гаф авач, тариф авуниз лайихлу пешекар я.

Инсанвилин ерийриз, кIвалахдал рикI хьуниз килигна, “Касумкентсервис” ООО-дин кьиле авайбуру Н. Гьажибеговал цIийиз хтай “КамАЗ” машинни ихтибарна. Кьасумхуьруьн ва ЦIийи поселокдин куьчейра вахт-вахтунда къекъвез, Назима коммунальный кIеви амукьаяр кIватIзава, абур Кьасумхуьруьн кьилихъ галай полигондал тухузва.

Гьа са вахтунда Назим Гьажибегова кудай ва ягъламишдай шейэрни кьенятзава, жегьил шоферриз кIвалахда куьмекар гузва.

Н. Гьажибегован намуслу зегьмет карханадин дирекцияди са шумудра пулдин премияр, грамотаяр гуналди къейдна. Мукьвара Назимаз райондин кьил Нариман Абдулмуталибован къул алаз райадминистрациядин Гьуьрметдин грамотани гана.

Хазран  Кьасумов