24-январдиз Дагъустандиз РФ-дин оборонадин министрдин заместитель Тимур Иванов мугьман хьанвай. “Лезги газетдиз” РД-дин Кьилин пресс-къуллугъди хабар гайивал, ам Сергей Меликовахъ галаз санал Махачкъалада, “Ипподром” микрорайонда, цIийи мектебдин эцигунар кьиле физвай гьалдихъ галаз таниш хьана.
Республикадин меркезда хкажзавай и мектеб чIехибурукай сад я. Милли “Образование” проектдин сергьятра аваз эцигзавай и дараматда кIелдай 1224 чка жеда. Ам кьуд корпусдикай ибарат я ва умуми майданди 26 агъзур кв. метр тешкилзава. Мектеб алай йисуз ишлемишиз вахкудайвал я.
Къейд ийин хьи, 2022-йисуз Дагъустанда “Демография” ва “Образование” проектрин куьмекдалди 51 мектебни аялрин 59 бахча эцигиз, цIийикIа туькIуьр хъийиз гъиле кьуна.
Мектебдилай гъейри, Тимур Иванов винидихъ тIвар кьур микрорайонда 200 чка авай аялрин бахча эцигзавай гьаларихъ галазни таниш хьана, цIийи военный госпиталь хкажзавай майдандал фена ва Кеферпатан Кавказдин республикада Каспийскдин флотилиядин инфраструктура вилик финин еришриз къимет гана.
Агьмед Магьмудов
