РД-дин экономикадин ва мулкар вилик тухунин министерстводи хабар гузвайвал, региондин руководство республикадин мулкунал туриствилинни рекреациядин (сагъламвал гуьнгуьна хутадай) жуьредин кьетIен экономикадин чка тешкилунин мумкинвилиз килигзава.
И месэладихъ галаз алакъалу яз, Минкавказдин, Росимуществодин, РД-дин Минэкономразвитиядин, Минтуризмдин, Минимуществодин ва “Кеферпатан Кавказдин курортар” АО-дин векилри са шумуд юкъуз чкайрал фена, республикадин муниципалитетрин администрацийрихъ галаз меслятар ва лазим маса кIвалахар кьиле тухвана.
“Каспийдин къерехда авай кластер (кIватIал — ред.) Къарабудахкент, Къаякент ва Дербент районрин сергьятра виликди тухун планламишнава. Региондин руководство ина туриствилин кьетIен мулк туькIуьрун патал лазим тир къурулушрихъ галаз алакъалу дараматар хкажунин мумкинвилиз килигзава”, — малумарна чешмеди.
Проектдин “Рекьерин картадин” сергьятра аваз кIвалахар кьиле тухузвай жуьре республикадин экономикадин ва мулкар вилик тухунин министерствода кьиле фейи рабочий дестедин совещанидал веревирдна.
Терефри гьуьлуьн къерехда авай чкаяр вилик тухуниз талукь къайда хкягъунин макьсаддалди республикада стратегиядин сессия кьиле тухвана кIанзавайдакай малумарна.
Къейд ийин, туриствилинни рекреациядин жуьредин кьетIен экономикадин мулкунин бинеда ана авай агьалийриз ва карханайриз тайин тир кьезилвилер ва артуханвилер хьун ава. Ихьтин мулкар арадал гъуни кIвалахдин чкаяр артухариз, экономикадин и хилехъ галаз алакъалу тир гъвечIи ва юкьван карчивилин субъектар арадал гъиз ва виликди тухуз, региондин бюджетдиз къвезвай къазанжияр артухариз куьмекда.
Гьазурайди — Жасмина Саидова
