15-февралдиз РФ-дин Гьукуматдин Председателдин заместитель Александр Новака уьлкведа шегьерарни хуьрер тамамдиз газдалди таъминарунин месэлайриз талукьарнавай совещание кьиле тухвана. Интернетдин алакъадин куьмекдалди адан кIва­лахда РД-дин Гьукуматдин Председателдин везифаяр вахтуналди тамамарзавай Абдулмуслим Абдулмуслимовани иштиракна.

Совещанидал “Сад тир Россия” партиядин генсоветдин секретарь Андрей Турчака рикIел хкайвал, газдин кьилин турба агакьна­ватIани, гьеле чпин сергьятрив газдин турбаяр тухун тавунвай кIвалер амай вири хуьрера­ и кар тамамдиз кьилиз акъудун патал яша­йиш­дин махсус программа кардик ква. РФ-дин Президентдин тапшуругъдал асаслу яз, алай йисан эхирдалди гьевес авай гьар сада­вай и программадик экечIиз жеда. Адан куьмекдалди газ авачир кIвалерин сагьибривай газдин магистралдин турбадилай чпин кIва­ле­рин сергьятрив кьван гьавая газдин турбаяр тухуз жеда. Амай кIвалахар авун (их­тилат кIвалин къенез кьван газ тухуникай физ­ва) программадик акатзавач, абур кIвалерин ие­сийри чпин такьатрихъ тамамарна кIан­зава.

Къейд ийин хьи, и программа кьилиз акъу­дунал федеральный дережада аваз гуьзчивал тухузва. Гьавиляй уьлкведин гьар са ре­гионда газдалди таъминарунин кIвалахар идара ийизвай махсус штабар арадал гъанва. Дагъустанда и штабдиз республикадин Кьил Сергей Меликова регьбервал гузва.

Къенин юкъуз уьлкведа санлай ихтилат физвай программада иштиракун патал 652 агъзур заявка агакьнава. Алатай вацрав ге­къи­гайла, и рекъем саки 100 агъзурдан хкаж хьанва. 225 агъзур заявкадин бинедаллаз икьрарар кутIуннава ва 100 агъзур касдин кIва­­лерин сергьятрив кьван, программада къалурнавайвал, магистралдин турбадилай гьавая газдин турбаяр тухванва.

Дагъустандикай рахайтIа, чи республикада заявкаяр газдин 39 къуллугъди, шегьер­рин, районрин администрацийри, МФЦ-дин филиалри кьабулзава. Алай вахтунда регионда программада иштиракун патал 1 агъзурни 500 заявка агакьнава. Абурукай 313-дан бинедаллаз икьрарар кутIуннава ва 94 кIвалин сергьятрив кьван газдин турбаяр тухванва. Къейд ийин хьи, и кIвалах исятдани давам жезва.

«Лезги газет»