Играми газет кIелзавайбур! Малум тирвал, лезги халкьдихъ тарихда кьетIен гел тунвай кьегьалар тIимил авач. Гьасятда фикирдиз Гьажи Давудан, Ярагъ Мегьамедан, Кьуьчхуьр Саидан, Алкьвадар Гьасанан, СтIал Сулейманан ва масабурун тIварар къвезва. Абурун экуь къаматар рикIера хуьн, чи чIехи бубайрин кьегьалвилерикай акьалтзавай несилризни чирвилер гун чи виридан умуми буржи я.
Гьа ихьтин къастар рикIевай стхайрин са дестеди Дербентдай чи районриз хъфизвай шегьре рекьин къерехра, санлай къачурла, ирид чкадал, тайин са касдин тIварцIихъ яна, булахар туькIуьрзава. СтIал Сулейманан райондин ЦIийи Макьарин хуьруьн кьилихъ туькIуьрзавай сад лагьай булах лезгийрин машгьур регьбер Гьажи Давудан тIварцIихъ ядайвал я. Алай вахтунда инал эцигунрин кIвалахар кьиле физва.
Булах жедай чкадал тарихдин метлеб авай гъвечIи комплекс арадал гъизва лагьайтIа жеда. И мулкунин чиле плита твазва, булахдин кьилихъ Гьажи Давудан ва лезги халкьдин кьегьал маса рухвайрин шикилар алай махсус баннер эцигда, цла Гьажи Давудан уьмуьрдин ва женгинин рекьикай кхьенвай малуматар алай мармардин кьул твада.
Ихьтин са комплекс туькIуьрун патал тахминан 500 агъзур манат пул акъатзава. Мумкинвал ва ашкъи авай гьар са ватанэгьлидивай и баркаллу кардик вичин пай кутаз жеда. Вири халкь патал хийир авай ихьтин крара чун сад хьун герек я. Пулдин такьатар Сбербанкдин картадихъ галкIурнавай 8928-679-75-79 нумрадиз (Мейланов Фетали) ракъуриз жеда. Къуй куь садакьаяр Аллагьди кьабулрай!
Чи мухбир
