И йикъара РД-дин Гьукуматдин Председатель Абдулпатагь Амирханов Каспийскдиз фена ва шегьерда эцигун пландик кутунвай яшайишдин объектрин месэлаяр веревирдна.
КьетIен фикир здравоохраненидин объектар эцигуниз гана. Шегьер тамамдаказ еримлу авунин “Каспийск” программадин сергьятра аваз агьалийрин сагъламвилихъ гелкъведай гегьенш мумкинвилер авай сад тир медицинадин комплекс эцигдайвал я.
Каспийскдин кьилин архитектор Наби Амирова премьер-министрдиз ЦГБ-дин мулкарал аялар ва чIехибур патал 500 чка жедай поликлиника, администрациядин корпус, 140 чарпай жедай сагъарунин корпус, гьакIни тади куьмекдин алава станция эцигуниз талукь схема къалурна. Ибурулайни гъейри, къведай йисуз Каспийскда 300 чарпай жедай аялрин многопрофильный азархана эцигунив эгечIда.
Гуьгъуьнлай кьиле тухвай совещанидал хсуси инвестордин иштираквал аваз 200 аялдиз чкаяр жедай цIийи бахча эцигунин месэладизни килигна. ЦIусад вацран къене дарамат эцигна ишлемишиз вахкун фикирдиз къачунва. Шегьердин умуми месэлаяр веревирддайла, гзаф мертебайрин кIвалер газдалди таъминарунин важиблувални къейдна.
«Лезги газет»
