Йисан эхиримжи вацра республикада гъиле кьунвай са жерге крарин нетижаяр кьазва. ИкI, 10-ноябрдиз “Дагъустан” РИА-дин майдандал “Карчивилин пеше машгьур авун” федеральный проект Дагъустандин мулкунал уьмуьрдиз кечирмишзавай тегьер веревирдна.
Гуьруьшдал сифте РД-дин карчивилин ва инвестицийрин рекьяй Агентстводин руководителдин заместитель Гьажи-Мурад Абашилова къейд авурвал, “Карчивилин пеше машгьур авун” проект “ГъвечIи ва юкьван карчивал ва кьилдин карчийрин теклифрин тереф хуьн” милли проектдин къурулушдик акатзава. Адан гафаралди, проектрин сергьятра аваз вилик эцигнавай асул макьсад карчивилел жезмай кьван гзаф дагъустанвияр желб авун я.
“Федеральный проект уьмуьрдиз кечирмишунин макьсаддалди алай йисуз республикадин мулкунал кар гъиле кьаз кIанзавай ва и рекье кIвалахзавай карчияр патал са жерге мярекатар тухванва. Чна и рекье гьерекат артухарзава, Карчивилин фабрикадихъ, Синергиядихъ галаз алакъада аваз кIвалахзава. Еке нетижайрив агакьун патал са шумуд дережада гегьеншдаказ кIвалах тешкилнава. И карда важиблу роль республикадин карчийрин куьмек гудай Центради къугъвазва”, — лагьана ада.
Дагъустанда авай “Карчивилин фабрика” проектдин руководитель Мегьамед Курбайтаеван гафаралди, къенин юкъуз республикада пуд программа кардик ква: “Фабрика-Аялар”, “Фабрика-Старт” ва “Фабрика ПРО”.
“Школайра кIелзавай аялар ва сифте курсарин студентар патал 3-19-декабрдин йикъара карчивилин рекьяй Олимпиада кьиле физва. 14-17 йисарин яшда авай аялрин арада тешкилнавай ам 2 паюникай ибарат я. 3-18-декабрдин йикъара Dagestan-olimp.ru сайтда заочный пай кьиле физва. 19-декабрдиз яшдиз килигна туькIуьрнавай 2 дестедай (14-15 ва 16-17 йисарин) 100 гъалибчи хкяда ва абуру 25-декабрдиз кьиле фидай финалда иштиракда. Гъалиб хьайибуруз пишкешар — планшет, телефон ва электронный ктаб гуда”, — хабар гана Курбайтаева.
Малум хьайивал, бизнесдин рекье сифте камар къачуз кIанзавайбур патал “Фабрика-Старт” курс кардик кутунва. Къенин юкъуз ина 500 касди чирвилер къачузва. Курсунин иштиракчийри, муаллимрин-регьберрин къаюмвилик кваз, “ичIи чкадилай” бизнес гъиле кьазва. Муаллимрин-регьберрин арада республикадин жуьреба-жуьре хилерай еке агалкьунар хьанвай бизнесменар ава. Абуру жегьилриз чпин пешедин сирер чирда, жуьреба-жуьре меслятар ийида. Къейд авурвал, ихьтин курсара, кIваляй экъечI тавуна, яни онлайн-къайдада кIелайтIани жезва. Тамам делилар Dagestan-start.ru сайтдай жагъида.
Дагъустандин карчийрин куьмек гудай центрадин пешекар Юсуп Тагьирова хабар гайивал, федеральный программадин сергьятра аваз, карчивилин пеше машгьурун патал тахминан 9,5 агъзур касдив делилар агакьарун фикирда кьунва. Къенин йикъалди 1727 касди карчивилин пешедиз талукь чирвилер къачунва, финансрин рекьяй савадлувал хкажнава ва 170 касди и рекье хсуси кар гъиле кьунва.
Амина Муслимова
