15-февралдиз Махачкъалада общественный деятель, алим, РД-дин лайихлу экономист Абдул­къафар Исакьович Агьмедов (1929-2018) рикIел хуьнин мярекат кьиле тухвана. Ана республикадин руководстводин, агъсакъалрин Советдин векилри, Халкьдин Собранидин депутатри, Ахцегь райондин кьил Осман Абдулкеримова, Азербайжандай атанвай лезгийри, ­Агьмедован мукьва-кьилийри,  дустари, республикадин меркезда авай лезги интеллигенциядин ва СМИ-рин векилри иштиракна. Бязи юлдашрин рахунар агъадихъ куьрелди гузва.

Бажарагълу тележурналист, РД-дин искусствойрин лайихлу деятель Гуьлера Камиловади залдавайбур А.Агьмедован уьмуьрдинни яратмишунин рекьихъ галаз та­нишарна, рагьметлудан экуь къамат ва лайихлувилер рикIел хкун, къейдун патал парабуруз трибунадихъ теклифна. Экрандилай А.Агьмедовакай документальный фильмайрай кIусар къалурна.

— Абдулкъафар Агьмедов пара рекьерай бажарагъ авай зурба кас тир. Адаз неинки са Ахцегьар, гьакI Дагъустан, Азербайжан, Россия — вири инсаният пара кIандай. Ихьтин кас рикIел хкуналди, адан мурадар-весияр кьиле тухун патал къенин йикъан чи къайгъуйрикай рахадай мумкинвал хьанва, — мярекат ачухуналди, къейдна РД-дин Халкьдин Собранидин Предсе­дателдин заместитель Магьмуд Магь­мудова.

Энрик Муслимов, РД-дин милли политикадин ва диндин месэлайрин рекьяй министр. — 1929-йисуз Бакуда дидедиз хьайи Аб­дул­къа-фара Азербайжан пата гьами­шалугъ яз вичин руьгьдин са пай туна. Хайи халкь­дин са пай гьана авайвиляй касди 1998-йисуз “Да­гъус­тан-Азербайжан” общество арадал гъана­ ва общественный и тешкилатдин куьмекдалди хал­кьар агудиз, абурун арада дуствилин, культурадин, тарихдин алакъаяр мягькемариз алахъна. Эхь, и важиблу кIва­лах ада вичин ху­шу­нал­ди, общественный тешк­илатдин куьмекдалди агалкьунралди тамамарна.

Юрий  Сагитов, экономикадин илимрин доктор, профессор. — Абдулкъафар Агьмедовахъ галаз ду­ст хьунин кьисметдал за дамах­зава. Бажарагълуди вири рекьерай бажарагълу жеда лугьудайвал, ам общественный деятель, хъсан тешкилатчи, экономист, журналист ва къени къилихрин камаллу инсан тир. Пешекарвилинни инсанвилин ерияр сад хьиз вине тирвиляй ам вири крара кIвен­кIвечи — башчи хьана. Экономикадин рекьяй Агьмедован проектар къе республикадин экономика вилик тухунин стратегиядин бинеда гьатнава.

Осман Абдулкеримов, “Ахцегь район” МР-дин кьил. — Абдулкъафар Агьмедов хьтин кьегьалар рикIел хуьниз, абурулай чешне къачуниз чун мажбур я. Районэгьлийрин рикIел ам виридалайни нетижалу регьбер яз алама. 1961-йисуз, 32 йисавай жегьил итим яз, райондин кьиле акъвазай ада 8 йисан къене Ахцегьар тамам шегьердиз элкъуьрна. Кьилди къачуртIа, къелемлухарни багълар артухарна; емишар хуьдай чкаяр, ГЭС-дин къанал, чIем-ниси хкуддай ва “Сельхозтехника” карханаяр, механизмламишнавай МТФ-яр арадал гъана. “Къизил дередин” мяденра геолого-разведкадин кIвалахар тешкилна; республикада сифте яз телеретранслятор, АТС, аэропорт, Гъалибвилин 20 йисан шадлухдай Баркаллувилин обелиск эцигна; чкIизвай куьгьне кIвалерин чкадал “Самур” мугьманхана, “Шалбуздагъ” универмаг, спортдворец, поликлиника, райбольница,  школаяр, “ЦIийи дуьнья” газетдин редакция патал типографияни галай дарамат,  музыкадин школа, халкьдин театр, Хуьруьга, Лутку­на, Цуругъа, КьакIа, Хи­не, Къурушдал ва Мугъандин къишлахра клубар эцигна; “Цуьквер сувар”, “Яран сувар”, “Маргъу­хъанрин сувар” арадал хкана; Мегьарамдхуьруьн зонада ЦIийи Усур ва ЦIийи Гъуьгъвез хуьрер кутуна ва икI мад. Нетижада Октябрдин 50 йисан юбилейдиз Ахцегь район КПСС-дин ЦК-дин, СССР-дин Верховный Советдинни Совминдин гъиляй-гъилиз кеъведай яру пайдахриз лайихлу хьана.

Гьажибуба  Рустамов, об­ще­ст­­венный деятель. — Абдулкъафар Агь­медов заз Ахцегьиз кIвалахал атай 1962-йисалай чида. Чун кIеви дустар хьана. Зи машгьур ата-буба, тарикъатдин шейх Ярагъ Мегьамед  эфендидин лайихлувилер, пак тIвар-кар арадал хкиз куьмек авурди Абдулкъафар я.

А.Агьмедован уьмуьрдинни яратмишунрин баркаллу кIвалахар рикIел хкунин хуш ке­лимаяр Къурбаналийрин Камрана, Гуьлалийрин Айваза, ЭчIегьви Абира, Ахцегь райондин культурадин управленидин начальник Къистер  Гъаниевади, жегьил шаир Сулейман  Сулейманова, МВД-дин отставкада авай полковник Агъалар Пулатова, лезги  писателрин Со­юздин правленидин председатель  Максим  Алимова, алим  Султанверди  Эмирова  лагьана. Абуру, ватанперес касдин тIвару­нихъ Ахцегьрин са куьче ягъу­налди, адан къамат районэгьлийрин рикIе­ра эбеди авунин теклиф гана.

Эхирдай Абдулкъафаран стха, РФ-дин лайихлу энергетик, республикадин Общественный палатадин член Эседуллагь Агьмедова ­мярекатда иштиракай вирибуруз чухсагъул лагьана.

Дашдемир Шерифалиев