Республикада тамарин майишатдин кIвалахар кьиле тухунин еридиз къимет гуз башламишнава. Алай йисуз “Рослесинфорг” ФГУ-ди тамар цIаяр кьуникай, зиянкар гьашаратрикай гьикI хуьзватIа ва атIанвай, терг хьанвай чкайра тамар гьикI арадал хкизватIа, гьакIни алатай йисан нукьсанар арадай акъуднавани, авачни ахтармишда. КIвалахар идарадин Воронежда авай пешекарри кьиле тухуда ва Кьасумхуьруьн тамарин майишатдиз талукь жеда.
КIвалах, хабар гузвайвал, сентябрдалди давам жеда. Воронежлеспроектдин директор Игорь Мазурова хабар гайивал, ахтармишунин кIвалахар 22 агъзур гектардин майданда кьиле тухуда.
Санлай къачурла, Кьасумхуьруьн тамарин майишатдик акатзавай тамарин 44 участок ахтармишда. Идахъ галаз сад хьиз, алатай йисуз нукьсанар жагъай участокризни килиг хъийида. Кьилди къачуртIа, тамар кутазвай чкайра накьвадин гьалдиз, цIаяр кьуникай хуьзвай жуьредиз, тамухъанри аватнавай тарар, хилер гьикI вахчузватIа, тамухъ гьикI гелкъвезватIа, гьадаз фикир гуда.
Эхиримжи вахтунда ихьтин кIвалахар республикадин мулкунал 2020-йисуз кьиле тухванай. А чIавуз анжах 44,2 процентдин крарал рази хьанай.
«Лезги газет»
