Яшлубурун югъ чи уьлкведа 1991-йисалай инихъ, адет яз, 1-октябрдиз къейдзава. Эхь, им яшлубурун патахъай къайгъударвал авунин гьакъиндай малумарзавай кьетIен сувар я. Ам гьар йисуз Ахцегь райондин КЦСОН-дин идарадани (жемятдиз яшайишдин рекьяй къуллугъунин центр) гегьеншдиз кьиле тухузва. Ингье и сефердани 30-сентябрдиз Центрадин залда «Яшлубурун къайгъударвал — жегьилрин буржи!» лишандик кваз тешкилна.
Суварин къайдада безетмишнавай залда, гьар са нямет алай суфрайрихъ, камаллу агъсакъалриз гьуьрмет авунин лишан яз, кьулухъ уьмуьрдин девлетлу тежриба галай зегьметдин ветеранар — бадеярни чIехи бубаяр — ацукьнава. Ширин суьгьбетрал машгъул, халкьдин милли манийрикай лезет хкудзавай абурун рикIелай са геренда, на лугьуди, кIвалин-йикъан гьар йикъан къайгъуяр алатна, жегьил вахтар рикIел хкизва… Абур хуш келимайралди тебрикуналди, мярекат КЦСОН-дин директор Малик Агьмедова ачухна.
— Гьуьрметлу диде-бубаяр, бадеярни чIехи бубаяр! Гьар са инсандиз, обществодиз чпин патав уьмуьрдин уькIуь-цуру акунвай камаллу меслятчияр, насигьатчияр хьун бахт я. Патав чIехиди гвачтIа, са чIехи къванцел хьайитIани алукь, женнет дидедин кIвачерик ква лугьудай халкьдин мисалар ава. Эхь, яшлу диде-буба кIвалин куьлег, гьуьрмет, берекат, даях я. Чи идарадин везифаяр куь гьуьрмет хуьникай, яшайишдинни медицинадин ва маса месэлайрай къайгъударвал авуникай ва, гьелбетда, куь уьмуьрдин хъсан тежриба жегьилривни агакьариз куьмекуникай ибарат я. За квез чи идарадин коллективдин, райондин кьиле авайбурун патай сувар рикIин сидкьидай мубаракзава. Къуй квехъ чандин сагъвал, яргъи уьмуьр хьурай! — лагьана ада.
Райондин медениятдин кIвалин манидар Эмирсултан Бегееван манийринни мярекатдин иштиракчийрин кьуьлерин ва школьникри чпин бубайриз бахшнавай шииррин арада тамадади, нубат-нубатдалди гаф гуналди, тебрикрин хуш келимаяр гваз райондин дишегьлийрин советдин председатель Таира Муспагьова (ада манини лагьана), ветеранрин Советдин председатель Нажмудин Гудаев, зегьметдин ветеранар тир Рагьимат Гьажиева, Марьям Къазибегова, Саимат Магьмудова, Ильяс Сурхаев, Якъут Агьмедова, Севинжи Муртузалиева (шаирди яшлубуруз талукьарнавай вичин са шиирни кIелна) Никъият Мурсалова, Рафигъа Межидова, Къеземет Мурсалов, и цIарарин автор ва масабур рахана. Вирибурун гафар, фикирар сад тир: яшлубурун дердийрикай хабар кьазвай райондин кьиле авайбур ва КЦСОН-дин коллектив пара кьадар сагърай! Къуй кьиле физвай дяведин махсус серенжем гъалибвилелди акьалтIна, чи рухваяр сагъ-саламатдиз, хуруйрал орденарни медалар алаз, чпин хизанрин, диде-бубайрин патав хтурай! Къуй уьлквейрин пачагьарни агъаяр мергьяматлу, дуьнья ислягь ва мублагь хьурай! Диде-бубайринни бадейрин ва чIехи бубайрин рикIер чпин веледрикай динж хьурай!
Районэгьлийриз яшайишдин рекьяй къуллугъунин центр ачухайдалай кьулухъ ана кIвалахзавай тежрибалу къуллугъчи, яшлубуруз къуллугъунин отделдин кьил Фироза Гьамзаевади агъсакъалриз, райондин яшлубуруз сувар мубаракна, центрадин кIвалахдикай суьгьбетна, — районда яшлу, игьтияжлу, набут 531 кас ава, абурун дерди-гьалдикай 60 къуллугъчиди хабар кьазва ва яшайишдин къуллугърин гьар жуьре проектрай кIвалахзава. Абуру йисан къене 600-далай артух яшайишдин ва медицинадин рекьяй гьар жуьредин куьмекар ийизва: тIуьн-хъун гузва, кIвалер къакъажзава, кIарасар хазва, ичер ахтIузва, дава-дарман ийизва, гьамамдиз ва тIебиатдал экскурсийриз тухузва ва икI мад. Яшлубурунни игьтияжлубурун ихтиярда чи центрада гьар жуьре тренажёрар ава. Ина абур гьар жуьре къугъунрал (тIамаяр, шахматар, домино, шеш-беш) машгъул я, — къейдна Фироза Гьамзаевади.
Чеб КЦСОН-да икI хъсандиз агъмишунай сагърай лугьуналди, агъсакъалар гъилера савкьатарни аваз, разивилелди хъфена.
Дашдемир Шерифалиев
