7-февралдиз СтIал Сулейманан райондин кьил Нариман Абдулмуталибован регьбервилик кваз коронавирусдин азар чукIунихъ галаз женг чIугвадай Оперативный штабди гьар гьафтеда кьиле тухузвай совещанидал районда эхиримжи йикъара арадал атанвай эпидемиологиядин гьалар веревирдна. Идакай муниципалитетдин сайтда хабар ганва…
Райондин больницадин кьилин духтур Жафер Къурбанисмаилова вичин докладда къейд авурвал, эхиримжи гьафтеда коронавирусдин азардикди начагъ ксарин кьадар 5 сеферда артух хьанва, амма абурун арада заландиз азарлубур авач. Алай вахтунда больницадин садакай масадак акатдай азаррин отделенида адетдинди тушир стIалжемдикди начагъ тир — 18, гьа гьисабдай коронавирус азар квайди тестдалди тестикь хьанвай 5 кас къатканва. Эхиримжи гьафтеда азар квайди тестикь хьанвай 8 кас больницада къаткурна ва сифтегьан тестри мадни 80 касдик азар квайди дуьздал акъудна. Абурукай яшар тамам тахьанвай кьве аял ва са таза аял республикадин клиникадин махсус отделенидиз агакьарнава. Амбулаторный къайдада сагъарзавай ксарин кьадарни гзаф хьанва. Духтуррин гуьзчивилик кваз кIвалера 689 кас (429 кас са гьафтеда) сагъарзава: абурукайни 140 касдик (82 кас са гьафтеда) сифтегьан тестди коронавирус квайди къалурна, 515 кас (347 кас са гьафтеда) вирус квайбурухъ галаз алакъа хьана ва 34 кас (7 кас са гьафтеда) адетдинди тушир стIалжемдикди азарлу хьана. Амбулаторный къайдада 120 кас, пулсуздаказ дарманар агакьаруналди, сагъарзава.
Кьилин духтурдин гафаралди, виликдай хьиз, исятдани чIехи яшара авай, кьилди къачуртIа, яшар 60-далай алатнавай инсанар гзаф азарлу жезва. Коронавирус 5 аялдик акатнавайдини тестикь хьана. Туьтерин ва нефесдин органрин азаррикди начагъзавайбур фикирда кьуртIа, школайра кIелзавай аялрин арада абурун кьадар гзаф я. Исятда авай вирус тестралди тестикь жезвачтIани, коронавирусдин цIийи “омикрон” штамм (саки 90 процент) яз хьунни мумкин я. Виликанбурув гекъигайла, цIийи штаммдикди азарлу хьанвайбурун гьалар пис туш. Амма и жуьре (штамм) лап фад чкIизва, районда арадал атанвай гьалари и кар субутзава.
Жафер Къурбанисмаилова вичин докладда кьилди хуьрериз талукь делиларни раижна. ИкI, виридалайни гзаф ксар чIехи хуьрера азарлу хьанва. Абурукайни 82 процент пенсиядин яшара авайбур я. Адан гафаралди, мукьвал гьафтейра азар акатзавайбурун кьадар яваш-явашдиз агъуз аватда. Поликлиникада азарлуяр кьабулун вахтуналди акъвазарнавайвиляй медицинадин сифтегьан звенодин идарайрал еке пар ацалтзава. ЦРБ-дин “Тади куьмекдини” вири къуватралди кIвалахзава, суткада 20-далай виниз азарлуйрин гьарайдиз гьай лугьузва.
Кьилин духтур районда коронавирусдиз акси рапар ягъуникайни рахана. Адан делилралди, районда 17525 касди азардиз акси рапар янава, ида 61% тешкилзава. Виликан гьафтеда вакцина авачирвиляй и кIвалах акъвазаруниз мажбур хьана, амма жуьмядиз поликлиникадиз чIехибур патал — 600, аялар патал 70 доза хкана. ЧIехибуру рапар ягъун давамарзава, амма аялриз рапар ягъиз кIандайбур авач.
Азар чукIун тавун патал Ж.Къурбанисмаилова эпидемиологиядин чIуру гьалар арадал татунин къайдайрал амал авуниз, ПЦР-тестар вахкуниз ва азардиз акси рапар ягъуниз эвер гана. Мадни ада Оперштабдин членривай аялриз коронавирусдин азардиз акси рапар ягъунин важиблувилин гъавурда тунин кIвалах тухун тIалабна.
Гуьгъуьнлай совещанидал РУО-дин начальникдин заместитель Къачабег Аминова чирвилер гудай идарайра арадал атанвай гьаларикай доклад авуна. Кьилди къачуртIа, ада райондин кьве мектеб — Кьасумхуьруьн 1-нумрадин ва ЦIийихуьруьн — дистанционный къайдада чирвилер къачунал элячIунин къарар кьабулнавайди раижна. Чирвилер гудай идарайра авай гьалар, гьа гьисабдай яз азарлу хьайи аялрин, муаллимрин ва амай персоналдин гьахъ-гьисаб гьар йикъан гуьзчивилик квайди къейдна. Адан гафаралди, райондин амай мектебра гьалар пис туш, гьавиляй абурун директорри аялри адетдин къайдада чирвилер къачунин къарар кьабулна.
Райадминистрациядин кьилин общественный хатасузвал хуьнин рекьяй заместитель Абуталиб Фатуллаев республикадин кьилин санитарный духтурдин ковиддиз акси тапшуругъар кьилиз акъудзавай гьалдикай рахана. Кьилди къачуртIа, ада хуьрерин поселенийрин кьилеривай диндин идарайрин кIвалах гуьзчивилик кутун, и хиле, гьакIни яшайишдин рекьяй къуллугъзавай ва хуьрерин администрацийра кIвалахзавай ксариз чкайрал ПЦР-тестар вахкудай мумкинвал тешкилуник гьерекат кутун теклифна.
Совещанидин нетижаяр кьадайла, райондин кьили чIуру азардихъ галаз женгина вири къуватар ишлемишун, гьакIни агьалийри ва жавабдар вири ксари эпидемиологиядин гьалариз талукь къайдайрал кIевелай амал авун лазим тирди къейдна. Оперштабдин членриз талукь идарайрихъ галаз санал хатасузвал ва азардин вилик пад кьунин серенжемар (гьа гьисабдай яз инсанар гзаф кIватI жезвай чкайра дезинфекция авунин), гьакIни СМИ-рин такьатрихъ галаз санал агьалияр (гьа гьисабдай яз диде-бубаяр аялриз коронавирусдиз акси рапар ягъунин важиблувилин) гъавурдик кутунин кIвалахар кьиле тухунин (ва икI мад) са жерге тапшуругъар гана.
«Лезги газет»
