“Кьурагь район” МР-дин пресс-къуллугъди хабар гайивал, администрацияда нубатдин совещание кьиле фена. Адан кIвалахда райондин администрациядин къуллугъчийри, хуьрерин администрацийрин кьилери, са жерге идарайрин руководителри ва маса юлдашри иштиракна. Совещание райондин администрациядин кьилин заместитель Альберт Исаева кьиле тухвана.

Мярекатдал райондин образованидин отделдин начальник Рамазан Катибова школайрин коллективар кIелдай цIийи йисаз гьазур жезвай гьалдин гьакъиндай малумат гана.

Ада лагьайвал, образованидин идарайра ремонт авунин 80 процент кIвалахар куьтягьнава. Амай гьафтейра вири крар кьилиз ахкъудда. Гьар са идарадиз талукь яз акт  кхьи­да ва ам РД-дин образованидин ва илимдин министерстводиз рекье твада. Хатасузвилин гьа­къин­дай паспортар 23 идаради гьазурнава, 4 идаради абур гьазурнавач.

“Культурадин, машгъулатрин ва туризмдин центр” МБУ-дин начальник Абдулкъадир Будаева малумарайвал, райондин культурадин идарайрин коллективар милли манийрин “Кьурагь дагъларин авазар” фестивалдиз  гьазур жезва.

Пенсийриз талукь идарадин начальник Агьмед Назаралиева кIватI хьанвайбуруз райондин 16 йисан яшдалди авай аялриз президентдин пулар гузвай гьалдикай лагьана.

— Чна гьазурнавай сиягьда 500 аял авай. Малум хьайивал, и сиягьда рагьметдиз фенвай  аяларни гьатна. Вучиз лагьайтIа,  хизанриз абур рагьметдиз финин гьакъиндай талукь документ ганвачир.  И месэ­ла гила суддин куьмекдалди гьял­на кIанзава. И кар тавунмаз, чавай сиягь кьабулзавач. Идалайни гъейри, сиягьда тунвай бязи аялар, абурун хизанар райондилай ва республикадилай къеце яшамиш жезва. Гьавиляй чун са кьадар кIеверани гьатна. Са рахунни алач, чна са аял­ни президентдин пул агакьар тавуна тадач.

Кьурагь райондани коронавирус лугьудай тIугъвалди инсанар къалабулухдик кутуна. Абуруз медицинадин рекьяй куьмек тешкилнавай гьалдикай райондин больницадин кьилин духтур Азим Азимова малумат гана. Ада къейд авурвал, эхиримжи йикъара тIугъвалдик 13 кас начагъ хьана. Абурун гьакъиндай больницадин духтурри къайгъу чIугвазва. Республикада гьеле карантин алуднавач. Гьавиляй гьар са кас маскаяр алаз къекъуьн важиблу тирдакай лагьана.

Совещанидал хуьрерин администрацийри налогар кIватIунин,         3 йисалай 16 йисав агакьна яшда  авай аялриз 10 агъзур манат пулар гунин, поселенийрин уставрик дегишвилер ва алаваяр кухтунин месэлайризни килигна.

«Лезги газет»