Дагъустандин мектебра кIелзавай аялриз Россиядин медицинадин кар алай вузди химиядай ва биологиядай теш­килзавай Пирогован олимпиадада иштиракуниз эвер гузва. Олимпиада кьвед лагьай сеферда кьиле тухузва, сифте йисуз ана уьлкведин 83 региондай тир 6 агъзур жаванди  иштиракнай.

Алай йисуз олимпиададин куьмекдалди 10-11-классра кIелзавай жегьилривай ва юкьван пешекарвилин образование къачузвай студентривай чпин чирвилер ахтармишиз  жеда.

Олимпиадада иштиракун патал 1-но­я­брдилай 20-ноябрдалди университетдин сайтда регистрация авун, хсуси делилар агакьа­рун ва профиль хкягъун лазим я. Олимпиада кьве паюникай ибарат же­да: сад лагьайди, яни хкядайди 2021-йисан 22-ноябрдилай 25-ноябрдалди (яр­гъал мензилда авай жуьреда) кьиле фи­да; кьвед лагьай пай, яни нетижаяр кьадайди — 2022-йисан 2-мартдилай 4-мартдалди. Нетижаяр кьадай пай очный къайдада (заочный къайдадизни килигун мумкин я) Москвада, Россиядин мил­ли ахтармишунрин медицинадин Н.И.Пирогован тIвару­нихъ галай университетдин (РНИМУ) кьилин дараматда кьиле тухуда.

Пирогован олимпиададин гъалибчийриз дипломар, къиметлу ва рикIел аламукьдай пишкешар, бюджетдилай къерехдай яз вуздик экечIдайла, 30% кьезилвилер гуда, гьакIни, университетдик экечIдайла, абуру олимпиадада иштиракайди кваз кьада, общежитида нубатдилай къерехдай яз  чка гуда.

«Лезги газет»