Чаз малум тирвал, гзаф хуьрерин мектебра, культурадин маканра край чирдай пипIер — музеяр ачухнава. Гьа жергедай яз Рутул райондин Хъуьлуьдрин хуьруьн школадани та­рихдин тарсар тухузвай тежрибалу муаллим, зегьметдин ветеран  Къурбанов  Сажидин  кьиле аваз тарихдин музей арадал гъанва.

Къурбанов Сажидин Лети­фович 1953-йисуз Рутул райондин Хъуьлуьдрин хуьре му­ал­лимдин хизанда дидедиз ­хьана. Хуь­руьн мектеб куьтягьай ам Дербентдин педучилищедик экечI­на. Ана пешекарвал къачур жегьил муаллим Ихрекрин сифтегьан классрин муаллимвиле тайинарна. Кьве йисуз Герма­ниядин Бург шегьерда армиядин жергейра къуллугъна хтай ада сифте  Играхърин,  ахпа  Лакунрин хуьрера муаллим яз кIва­лахна. Гуьгъуьнлай Дагпединститутдин (гилан университет) тарихдин фа­культетда заочнидаказ кIел хъувур ада 1979-йисалай инихъ тарихдин муаллим яз хайи хуьре кIвалахзава. Сажидин муаллимдин чалишмишвилер се­беб яз гила Хъуьлуьдрин хуьруьн школадани тарихдин музей хьанва.

Ина чи ата-бубайрин девирда ишлемишай хуьруьн майишатда герек алатар, къаб-къажах ва къадим маса шейэр ава.

Пешедив рикI гваз эгечIу­налди, аялрихъ ва диде-бубайрихъ галаз хуш рафтарвилин алакъаяр хуьналди, Сажидин муаллимди вичиз еке гьуьрмет къазанмишзава.

Ада вичин зегьметдалди туькIуьрнавай музейдин кабинетда вири экспонатар чпин чкайрал эцигнава. Муаллимдин ва аялрин къуватралди  абурун кьадар къвердавай артух жезва. Гележегда Хъуьлуьдрин хуь­руьн музейдиз элкъведай край чирдай пIипI — школадин му­зей патал тайинарнавай чка къвердавай дарискъал жезва.

С.-А.Абдурашидов