Хабар гузва!
Оперативный штабдин начальникдиз: 1999-йисан августдин 2-10-йикъара Чечен Республикадин сергьятдилай Дагъустандин ЦIумада ва Ботлих районриз бандитрин международный кIеретIар чапхунчивилелди гьахьуникди, республикада арадал атай вакъиайрихъ галаз алакъалу яз, чна кьиле тухвай крарин гьакъиндай хабар гузва!
И йикъара Махачкъала шегьердин администрациядин аппаратдин вири къуллугъчийри ва районрин муниципальный идарайрин работникрини суткадин кьиляй-кьилиз, ял ягъун авачиз, кIвалахна. И кардиз абур садани мажбурнавачир.
Телевиденидай хабар гайидалай кьулухъ шегьердин администрациядиз неинки меркездай, гьакI районрайни, бандитриз акси женгиниз чеб тухун тIалабзавай арзаяр гваз, цIудралди инсанар атана.
Лагьана кIанда, и йикъара шегьердин миграциядин ва социальный хилерин вири къуллугъчийри, са жуьрединни кичIевал ва инжиклувал авачиз, кIвалахна. Абурун куьмекдалди женгер кьиле физвай районрай катна атанвай 10 агъзур касдив агакьна агьалияр меркезда акъваздай ва яшамиш жедай чкайралди таъминарна.
10-августдиз шегьер хуьнин (самооборонадин) отряддиз гуьгьуьллувилелди кхьейбурун кьадар 2 агъзурдалай алатна.
Самооборонадин дестейриз гуьгьуьллубур кхьинин везифаяр хиве тур шегьердин административно-правовой управленидин къуллугъчияр тир М-З.Жамалудинова, З.Мутаева,Ш.Абдусамадова, А.Нурмегьамедова, Т.Мегьамедова суткадин кьиляй-кьилиз чпин чкайрал кIвалахна. И карди самооборонадин дестейриз къвез кIанзавай вирибурун игьтияжар таъминардай мумкинвал гана.
Дагъустанда ва гьакI Россиядин Федерациядани ополченидин ва самооборонадин дестейрин гьакъиндай кьабулнавай махсус законар ва я къарарар авачирвиляй, и дестейриз чпин хушуналди атай вирибур желбна. Гьа жергедай яз чиниз Россиядин Федерациядин маса субъектрай — шегьеррайни районрай атай ксарни кьабулна. ИкI 10-августдиз шегьердин самооборонадин отрядда РФ-дин маса субъектрай атанвай 17 кас авай: 2 кас — студентар — Москвадай, 5 кас — Татарстандай, 3 — Нижний Тагилдай ва Свердловскдай, 2 — Волгограддай, 3 — Астрахандай, 2 — Тюмендай ва Омский областдай атайбур.
Ставрополдин крайда яшамиш жезвай дагъустанвийрин саналди тир тIалабуниз килигна, кьилдин рота тешкилна ва абур Кьиблепатан Сухокумскдинни Кочубейдин патарив герек чкайрал эцигна. Рота тамамвилелди Акуша ва Леваша районрай тир агьалийрикай ибарат хьанвай.
Оперативный штабда кьабулнавай къарардал асаслу яз, 10-августдин йифиз, 11-августдин пакамалди, Ботлих ва ЦIумада районра женгер кьиле физвай чкадиз Интербригададин 350 женгчидикай ибарат сад авунвай отряд ва чкадин агьалийриз куьмек патал гуманитарный суьрсетар рекье туна.
И четин ва лап важиблу месэла гьялуник шегьердин администрациядин саки вири руководителри чпин лайихлу пай кутуна. Абурун жергеда шегьердин администрациядин кьилин патав гвай консультативный советдин член Х.М.Хасбулатов, ветеранрин гьерекатдин кьил И.Далгатов, Дагъустандин чкадин властрин Союздин исполнительный директор Гь.А.Балатов ва масабур авай.
Вахт гьикьван кьит тиртIани, 350 женгчидикай ибарат сад авунвай отряд тешкилунин ва герек чкадал рекье тунин кIвалах хъсандиз кьиле фена. 11-августдин пакамахъ Интербригададин отряд женгинин гьерекатрик экечIиз гьазур тир. И кар Дагъустандин ва гьакI Вирироссиядин патриотри, сад хьиз, вилив хуьзвай. И кардиз, мумкин я, вири планетади дикъет гузвай.
Интербригададин женгчияр чкадив агакьай гьа сифте декьикьайрилай женгерик экечIиз гьазур тир. Махачкъаладай экъечIдайла, гзаф шегьерэгьлийрин ва ополченцийрин тIалабуналди чи сад авунвай отряддиз Интербригададин тIвар гана. И тIвар вирибуруз хуш хьана. ГьикI хьи, Ватандиз залан акъвазай вири дуьшуьшра дагъвийри, сад хьана, са пайдахдик кваз, са хизанди хьиз, Ватандин азадвал патал женгер чIугурди я, и сефердани гьакI хьана.
Чкадал фидалди рекьера гьалтай вири хуьрера чи отряд агьалийри гзаф хушдиз ва рикIяй къвезвай алхишривди кьабулиз хьана. Диндихъ инанмишбуру, чун сагъ-саламатдиз элкъвена хтун патал, Аллагьдиз дуьаяр авуна. Хаджалмахи хуьре чи отряддик гьана арадал гъанвай 30 касдикай ибарат десте акахь хъувуна. Абурув чпин транспортдин такьатарни гвай.
Сад авунвай отряд агъадихъ галай тегьерда арадал атанвай.
Миллетдал гьалтайла:
даргияр — 170 кас,
аварар — 54 кас,
лезгияр — 39 кас,
яхулар — 27 кас,
къумукьар — 20 кас,
урусар — 5 кас,
табасаранвияр — 5 кас,
азербайжанвияр — 3 кас,
ногъайвияр — 2 кас,
рутулвияр — 2 кас,
татар — 3 кас,
маса миллетрикай — 18 кас.
Къуллугъдин жигьетдай:
муниципалитетрин идарайрин
руководителар — 49 кас,
бизнесменар ва карчияр — 74 кас,
кIвалах тийизвайбур — 59 кас,
фермерар ва рабочияр — 43 кас,
къуватдихъ галаз алакъалу къурулушрин
работникар — 18 кас,
илимдин идарайрин руководителар — 7 кас,
маса хилерин къуллугъчияр — 78 кас.
Ибурук 7 кас РД-дин Халкьдин Собранидин депутатар, районринни шегьеррин ва хуьрерин собранийрин депутатар — 19 кас, Европадин ва дуьньядин чемпионар — 4 кас, спортдин международный классдин мастерар — 4 кас, Россиядин спортдин мастерар — 19 кас, спортдин мастервиле кандидатар — 4 кас, разрядникар — 49 кас, Афгъанистанда женг чIугурбурукай — 31 кас, маса жуьреба-жуьре вакъиайра иштиракай 7 кас квай.
Душмандиз акси женгер чIугвадайла, чкадал фенвай отряддин членар — женгчияр тIуьнралди, автотранспорт ремонт ийиз ва бензиндалди таъминариз, чкадал ял ядай шартIар яратмишиз, чаз чкадин агьалийри ва администрацийрин руководителри куьмек гана. Абурук Хунзах райондин кьил А.Г.Омаров, ЦIумада райондин кьил А.С.Абдуразакьов, Ботлих райондин прокурор И.Ш.Къурбанов ва хейлин школайринни аялрин бахчайрин руководителар, хуьрерин агьалияр квай…
(КьатI ама)
Мердали Жалилов
