И йикъара Краснодардин крайдин Анапа шегьерда (900 спортсмендин иштираквал аваз) какахьай бягьсерай дуьньядин Кубок патал турнир кьиле фена. Дагъустандин хкягъай командадик кваз ана Дербентда тренер Рустам Къухмазован гъилик вердишвилер къачузвай ругуд спортсмендини иштиракна. Абурун жергедай тир Имам Гьасанова (7 йис) чемпионвилин тIвар къазанмишна. Надим Османов, Агъаси Султанов ва Жаватхан Шагьриведов — 2, Вадим Гьасанов 3-чкайриз лайихлу хьана.
— Имама зи гъилик чирвилер къачуз са шумуд варз я, — лугьузва Р. Къухмазова. — Зегьметдал рикl алай, тапшуругъар тамамдиз кьилиз акъудзавай, бягьсера, вири къуватар эцигна, эхирдалди женг тухузвай ам къенин юкъуз хъсан гележег авай жаван спортсмен я.
Чи мурадни вири жаванрихъ республикадин, Вирироссиядин ва международный акъажунра агалкьунар хьун я.
Къагьриман Ибрагьимов
