Докъузпара райондин образованидин управлениди акъудай къарардал асаслу яз, 13-апрелдиз Усугъчайдин СОШ-да  «Илимдиз — сад лагьай кам» тIвар алаз райондин сергьятра сад лагьай сеферда яз илимдинни тежрибадин конференция кьиле фена. Ана Докъузпарадин 2 ва 4-классрин аялри иштиракна.

Кьиле фейи конференциядал сад лагьай турда Усугъчайдин СОШ-дин, Каракуьредин СОШ-дин, Миграгърин СОШ-дин, ЦIийи-Каракуьредин СОШ-дин ва Авадандин СОШ-дин аялри заочный тегьерда  гьазурнавай  31 илимдин кIвалах  къалурна. Абурукай къимет гузвай пешекаррин Советди кьвед лагьай очный турдиз пуд мектебдин кlвалахар рекье туна.

Илимдинни тежрибадин конференция кьве хилекай ибарат тир. Абуру 16 аялди гьазурнавай докладриз яб гана. ТIебии илимрай – 11,  гуманитар илимрай -5 аялдиз.

Гуманитар дисциплинадин илимдин  хиляй агъадихъ галай аялриз чкаяр хьана:

1-чка-Бейтуева Алинадиз (Усугъчайдин СОШ);

2-чка-Ражабов Шарвилидиз (Усугъчайдин СОШ);

3-чка-Махсудов Расулаз (Авадандин СОШ);

ТIебии дисциплинадин хиляй:

1-чка-Къарибова Рекъиядиз (ЦIийи-Каракуьредин СОШ);

2-чкаяр-Чигалиев Жамалдиназ (Усугъчайдин СОШ) ва Саидова Олганадиз (Авадандин СОШ);

3-чка-Мусаева Иринадиз (Усугъчайдин СОШ) ва Османова Хадижатаз (Усугъчайдин СОШ) гана.

Жюридин дестедик УО-дин методистар тир  О.Османов, Т.Муллина, А.Абдуллаев, Р.Мегьамедханов ва райондин мектебрин муаллимар тир З.Асварова, М.Микаилов, А.Сулейманова, С.Агъасиева, С.Мусаибова ва И.Закиева квай.

Гуманитар дисциплинадин илимдин  хиляй председателвал Т.Муллинади, тIебии дисциплинадин хиляй — Р.Мегьамедханова авуна.  Гъалиб хьайи аялриз образованидин управленидин патай грамотаярни гана.

«Лезги газет»