Алатай киш юкъуз Сулейман-Стальский райондин Вини СтIалрин юкьван школада “Илимдиз кам” лишандик кваз 5-11-классра кIелзавай аялрин арада математикадай гьар йисуз кьиле тухун хъсан адетдиз элкъвенвай олимпиада нубатдин сеферда адан тешкилатчи ва ам кьиле тухузвайди тир технический илимрин доктор, профессор Абдул Гьажибалаевич Баламирзоеван къаюмвилик кваз кьиле фена. Ана Кьиблепатан Дагъустандай, кьилди къачуртIа, Сулейман-Стальский, Ахцегь, Дахадаев, Дербент, Докъузпара, Кьурагь, Мегьарамдхуьруьн, Хив ва Табасаран районрай тир 340-далай виниз аялриз чпин чирвилер къалурдай мумкинвал хьана.
РикIел хкин: сифтедай (2006-йис) А.Баламирзоева и серенжем анжах Вини СтIалрин юкьван школада 9-11-классра кIелзавай аялрин чирвилерин ери ахтармишунин, хъсандиз кIелзавай аялар руьгьламишунин, абурун гележег математикадихъ галаз алакъалу авунин мураддалди кьиле тухузвай. Гуьгъуьнлай (и серенжемдик кьилин категориядин муаллимар — ДГУ-дин матфак акьалтIарнавай Аскер Аскеров ва М.В.Ломоносован тIварунихъ галай МГУ-дин механикадинни математикадин факультет куьтягьай Гьабибула Гьабибулаев шерик хьана) олимпиадада Кьулан, Вини ва Агъа СтIалрин, ахпани Сулейман-Стальский райондин вири школайра кIелзавай аялриз чпин чирвилер къалурдай мумкинвал хьана. Жуьреба-жуьре йисара ина Махачкъала ва Каспийск шегьеррайни аялри иштиракна. Къенин юкъуз и олимпиада Дагъустандин Кьиблепатан территориальный округдин дережада аваз тешкилзавай гзаф важиблу серенжемдиз элкъвенва …
Шад жедай кар мадни ам я хьи, и къени кардик чпин пайни кутазвай, хайи халкьдин гележег патал къайгъу чIугвазвай кьилдин ксар, мергьяматлувилин фондар майдандиз акъатна. Виликан йисара хьиз, цIини олимпиададиз спонсорвал авурбурун жергеда Имам Яралиеван мергьяматлувилин “Умуд” фондни ава. Мярекат тешкилунин ва ам вини дережада аваз кьиле тухунин карда райондин администрациядини еке пай кутазва. Виридаз аферин ва баркалла!
Олимпиадада гъалиб хьайи аялрив шабагьар вахкуниз талукьарнавай мярекатда Сулейман-Стальский райондин кьил Нариман Абдулмуталибова, “Умуд” фондунин векил Савин Велиева, райондин образованидин управленидин начальник Гьуьсейн Шихбабаева ва масабуруни иштиракна. Серенжемдин тешкилатчийри ва мугьманри, математика вилик тухунал, аялрин алакьунар чирунал, абур руьгьламишунал ва чпин гележег математикадихъ галаз алакъалу авунал гьалтайла, олимпиададихъ еке важиблувал авайди къейдна.
Райондин кьили Абдул Баламирзоеваз районда кьиле тухузвай важиблу кIвалахдай, алакьунар авай аялриз куьмек гунай, абур руьгьламишунай, математикадин илим вилик тухунай сагърай лагьана.
Абдул муаллимдин суьгьбетдай малум хьайивал, йисалай-суз олимпиададиз итижзавайбурун кьадар, математикадиз гузвай фикир артух жезва. Им, санлай вири уьлкведа хьиз, чи республикадани дуьм-дуьз илимрихъ авай игьтияж артух хьунихъ галаз алакъалу я. Алай девир илимдинни чирвилеринди, математика лагьайтIа, илимрин шагь тирди инсанри къвердавай генани аннамишзава. Гъалибчивилин ва приздин гзаф чкайриз Дербентдай тир аялар лайихлу хьана. ЦIийихуьруьн юкьван школадин 9-классда кIелзавай, вич математикадай республикадинни Вирироссиядин хейлин олимпиадайрин гъалибчи ва призёр тир Шамил Тагьировани 1-чка кьуна. КIвен-кIвечи чкаяр кьур вири аялриз грамотаяр ва “Умуд” фондунин патай пулдин пишкешар гана. Идалайни гъейри, аялар олимпиададиз гьазурай 8 муаллимдин зегьметни сертификатар ва пулдин пишкешар (2 агъзур манат) гуналди къейдна. “Умуд” фондуни Гь.Гьабибулаеван лайихлувилеризни къимет гана. Абдул Баламирзоеван дустарин патай 17 аялдиз — I, 9 аялдиз — II ва 16 аялдизни — III дережайрин дипломар (талукь тирвал, 2,500, 1,500 ва 1000 манат), гьакIни 20 аялдиз грамотаяр ва гьар садаз 500 манат гана.
Рагнеда Рамалданова
