Сулейман-Стальский райондин Кьулан СтIалдал Россиядин Игит Радим Халикьов рикIера хуьнин лишан яз волейболдай XIII турнир кьиле тухвана. Ам ачухунин мярекатда муниципальный райондин кьил Нариман Абдулмуталибова, райондин депутатрин Собранидин председатель Штибег Мегьамедханова, райадминистрациядин жавабдар къуллугъчийри, Кьулан СтIалрин администрациядин кьил Мевлидин Шихагьмедова, Р.Халикьован багърийри, общественностдин векилри иштиракна.
Мярекат ачухдайла рахай Н.Абдулмуталибова, Кьулан СтIалрин юкьван школадин директор Ифриз Бабаевади, Игитдин стха Насир Халикьова, райондин спортдин ва жегьилрин крарин рекьяй комитетдин председателдин заместитель Муслим Селимова, райондин образованидин управленидин работникрин профкомдин председатель Халилбег Халилбегова Радим Халикьован кьегьалвиликай лагьана, ам бандитрин чIехи дестедихъ галаз кьиле фейи барабарсуз женгина игитвилелди телеф хьайиди, РФ-дин Президентдин Указдалди капитан Радим Халикьоваз Россиядин Игитвилин тIвар, адахъ галай 8 кас аскерриз “ВикIегьвиляй” орденар гайиди, Игитдин тIварцIихъ хуьре са куьче янавайди, Кьулан СтIалрин юкьван школада музей ачухнавайди рикIел хкана.
Мярекатдилай гуьгъуьниз райондин гьакимри, Игитдин багърийри Радим Халикьован гуьмбетдал цуьквер эцигна.
Гуьгъуьнлай хуьрерин 6 команда майдандиз экъечIна. Къизгъин женгерин нетижада турнирда 1,2, 3 ва 4-чкаяр, талукь тирвал, Агъа СтIалрин, Курхуьруьн, Кьасумхуьруьн ва Кьулан СтIалрин жаванрин командайри кьуна.
Тафаватлу хьайи командайриз медалар, кубокар, пулдин призар, грамотаяр ва къиметлу пишкешар гана. Турнирда тафаватлу хьайи кьилдин спортсменар — Тажиб Бейбалаев, Ренат Бейбалаев (кьведни Агъа СтIал), Мегьамедрагьим Къазанбегов (Кьасумхуьр), Славик Сагидов (Курхуьр) ва Тимур Небиюлаев (Кьулан СтIал) пулдин призриз лайихлу хьана.
Турнирдиз райондин администрацияди ва Халикьоврин хизанди спонсорвал авуна.
Хазран Кьасумов
