И мукьвара СтIал Сулейманан райондин кьил Нариман Абдулмуталибова И.Гь.Тагьи­рован тIварунихъ галай Россиядин халкьа­рин культурадин адетдин центрадин Дар­кIуш-Къазмайрин филиалдин заведующий  Сельвира  Къадимовадив  яргъал йисарин гьакъисагъ зегьметдай чухсагъулдин чар вахкана.

— Гьакъикъатдани, Сельвира Надировна вичин хиве авай везифаяр намуслудаказ кьилиз акъудзавай, хуьруьнвийриз культурадин хиле рикIивай къуллугъзавай ксарикай сад я, — лугьузва райондин культурадин отделдин начальник, Дагъустандин халкьдин ша­ир Майрудин Бабаханова. — Ада районда тухузвай культурадин ва шадвилерин мярекатра, республикадин фестивалра активвилелди иштиракзава. Чун адан кIвалахдилай гзаф рази я.

С.Къадимовади кIвалахзавай культурадин кIвал районда хъсан маканрикай сад яз гьисабзава. Хуьруьн администрациядин дараматда кардик квай ана хъсан къайда, михьивал ава, аквадай агитациядин такьатриз екез фикир ганва. Хуьруьн тарихдиз, Ватандин ЧIехи дяведин иштиракчийриз, Каспий гьуьляй нафт акъудунин сифте проект гьазурай академик Иметхан Шабановаз, хуьруьнвийрикай сифте яз химиядин илимрин докторвилин тIвар къачур Осман Шабано­ваз, РФ-дин лайих­лу ва РД-дин халкьдин­ артист Абдулкъадир Сайдумоваз, Азербайжандин игит, летчик-истребитель Сергей Мур­туза­лие­ваз, РФ-дин искусствойрин лайихлу деятель, академик Керим Керимоваз, лектор-международник Эседин Эминоваз ва машгьур­ маса даркIуш­вийриз талукь яз акъуд­навай стендри, фотомонтажри культурадин макандиз къвезвайбурун фикир чпел желбзава.

— Забит Ризванова вичин “Весида” кхьейвал, тарих миллетдин лап чIехи тербиячи я. Культурадин макандин цларал алай тарихдихъ галаз алакъалу материалриз, шикилриз жегьил несилди, иллаки хуьруьн юкьван школада кIелзавайбуру, еке итижни ийизва. Чна мукьвал-мукьвал школада кIелзавай-бурухъ галаз гуьруьшар, жуьреба-жуьре мя­рекатар тешкилзава, акьалтзавай несилдиз хуьруьн тарихдикай, хуьряй акъатай машгьур­ инсанрикай суьгьбетарзава, — лугьузва Сельвира Къадимовади. .

Культурадин макандихъ 14 касдикай ибарат тир художественный самодеятельностдин хъсан коллективни ава. Ада хуьре ва районда тухузвай культурадинни шадвилин мярекатра, фестивалра ва конкурсра иштиракзава. Агалкьунрай ганвай дипломар, грамотаярни ава.

— КIвалахдикай азад вахт чна, хуьруьнвий­ри, культурадин кIвале акъудзава, — лагьана чаз педагогикадин зегьметдин ветеран, шаир Эйзудин Сайдумова. — Чна ана газетри­кай, журналрикай менфят къачузва, ихтилатар ийизва. Чун тIамайрал, шахматрал къугъ­ваз­ва. Са гафуналди, хуьруьнвийри чпин азад вахт ина менфятлудаказ акъудзава. Сель­ви­ра Надировнани аниз къвезвайбурун ­къуллугъда акъвазнава. Намуслу зегьметдай­ адаз хуьруьнвийри сагърай лугьузва.

Чун инанмиш хьайивал, Сельвира Къадимова вичин пешедал рикI алай, тIебиатди кьетIен пай, бажарагъ ганвай кас я. Ам хьиз халкьдин къуллугъда акъвазнавай, кIвалах­завай инсанарни —  гьар са хуьруьн дамах.

 

Хазран  Кьасумов