Майдин вацран сифтегьан 3 юкъуз Каспийскда азаддаказ кьуршахар кьунай дагъустанви машгьур пагьливан Али Алиеван экуь къаматдиз бахшнавай международный 50-турнир кьиле фена. Ана дуьньядин 23 уьлкведай, гьа гьисабдай яз Белоруссиядай, Молдовадай, Узбекистандай, Словакиядай, Азербайжандай, Аргентинадай, Кубадай, Туьркиядай, Македониядай, Латвиядай, Польшадай, Индиядай, Къазахстандай атанвай 250-далай виниз спортсменри иштиракна. Россиядин хкянавай командадик 100 спортсмен квай. Адан са пай дагъустанви тIвар-ван авай спортсменар тир.
Турнирдиз теклифнавай багьа мугьманрин арада Олимпиададин чемпион Абдулрашид Садулаев, Россиядин азаддаказ кьуршахар кьунай Федерациядин президент Михаил Мамиашвили ва масабур авай. Гьам мугьманри, гьамни спортсменри юбилейдинди тир турнир хъсан тешкиллувал аваз кьиле фейиди къейдна.
2-майдиз турнир ачухуниз талукьарнавай мярекат кьиле фена. Ана РД-дин Гьукуматдин Председатель Артём Здуновани иштиракна. Мярекатдал ада Дагъларин уьлкведин зурба пагьливанрикай сад тир Али Алиеван — СССР-дин лайихлу тренер ва спортдин мастер, дуьньядин 5 сеферда, Советрин Союздин 9 сеферда чемпион Али Алиеван турнирда кьуршахар кьунай Сад хьанвай алемдин (UWW) календарда кесерлу чка кьазвайди, им вири дагъустанвияр патал спортдин еке сувар тирди, Али Алиев неинки зурба пагьливан, гьакI тIвар-ван авай са жерге спортсменриз хъсан тербия ва вердишвилер гуз алакьай тежрибалу тренерни яз машгьур хьайиди къейдна, спортсменрихъ агалкьунар хьунин келимаяр лагьана.
Мярекатдал Россиядин азаддаказ кьуршахар кьунай Федерациядин президент Михаил Мамиашвили турниррин кесерлувиликай, метлеблувиликай, хъсан нетижаяр къазанмишун патал кIвалахда фикир гана кIанзавай «куьлуь-шуьлуьйрикай» рахана.
Гуьгъуьнлай микрофондихъ А.Алиеван хва Зурканай Алиев атана. Ада кIватI хьанвайбурун, гьар йисуз и турнир кьиле тухуник пай кутазвайвайбурун, гьа гьисабдай яз Дагъустандин кьиле авай ксарин тIварарихъни чухсагъулдин, спортсменрихъ турнирда агалкьунар хьана кIанивилин келимаяр лагьана.
Шад мярекат “Лезгинка” ансамблдин кьуьлердайбуру мадни гурлу авуна. РД-дин халкьдин артист Тагьир Къурачева Али Алиеваз бахшнавай мани тамамарна.
Акъажунар Каспийскда зурба пагьливандин тIварунихъ галай спортдин ва жегьилрин дворецда кьиле фена. Турнирдин кьилин судья Махачкъаладай тир Олимпиададин категориядин судья Убайдулла Османов тир. Сад лагьай юкъуз заланвилин са шумуд категориядай бягьсер кьиле фена. ИкI, 86 кг-дин заланвал авайбурун арада финалда чи ватандаш, Россиядин, Европадин чемпион Даурен Куругълиев (шикилда чапла патахъ галайди) Кеферпатан Осетия-Алания республикадай тир Артур Найфоновахъ галаз гьасиррал экъечIна. Д.Куругълиев 2-чкадиз лайихлу хьана. Агъадихъ чна Алиеван турнирда 1-чкаяр кьур спортсменрин тIварар кьазва: Завур Угуев (57 кг, Россия), Баджранг Пуния (65 кг, Индия), Разамбег Жамалов (70 кг, Россия), Дарсам Жапаров (74 кг, Россия), Мегьамед Рамазанов (79 кг, Россия), Шарип Шарипов (92 кг, Азербайжан), Артур Найфонов (86 кг, Россия), Мегьамед Ибрагьимов (97 кг, Узбекистан) Владислав Байцаев (125 кг, Россия).
Къейд авун лазим я хьи, турнирдин пишкешрин фондни юбилейдин йисуз зурбади тир. ИкI, 1,2,3-чкаяр кьур спортсменриз, талукь тирвал, 500, 300, 100 агъзур манат гана. Гъалибвал къазанмишай спортсменрин тренерарни 100 агъзур манатдин кьадарда аваз пишкешдиз лайихлу хьана.
Рагнеда Рамалданова
