Хъсан инсанар авай магьле, хуьр, район рикIиз чими ва кIан хьун тIебии кар я. Ахьтин инсанар са гьина ятIани курсар кIелна хтанвайбур туш, гьелбетда. Ихьтин инсанар НуьцIуьгъа, Зизика, КIварчагъа, Сардархуьре, Сийида, Алкьвадрал, Агъа Макьа, ДаркIушрал ва маса хуьрерани зал гзаф дуьшуьш жезва. Къуй чпин кьадар мадни артух хьурай.
КIварчагъа тIвар-ван авай инсанар гзаф хьана, исятдани ава. Ханмегьамедов Жалалдин гьахьтинбурун арадай я. Ада “Коммуна” колхозда, ахпа совхоздани зегьмет чIугуна. И йикъара зал ам Кьасумхуьрел дуьшуьш хьана. Фадлай мукьувай такурвиляй чна яргъалди суьгьбетарна. Жалалдин алай вахтунда КIварчагъа мискIиндин имам я. И везифа адан хиве 2016-йисуз жемятдин собранидал туна. И кар адалай хъсандиз алакьзава. Жалалдинахъ хци сес, инсан инанмишардай мез, чирвилер, имамдиз герек вири лишанар авазва. Жемятри адаз яб гузва, буюрмишай кар тамамарзава. Халкьдин тIалабунриз вичини дикъет, яб гузва.
ИкI, жемятди имамдин тIалабуналди хуьре — кIвале кьейи касдин 52 йикъар кьиле тухузмач. Имам Жалалдина, агъсакъалрин советдихъ (председатель — Межидов Межид), активистар ва тешкилатчияр тир Алибалаев Асанбегахъ, Абдулмежидов Нейрудинахъ, хуьруьн администрациядин кьил Загьирбегов Завидинахъ галаз меслятар хьана, хуьруьз лап герек къвезвай хийирлу мад са шумуд дерди кьилиз акъуднава. ИкI, сурарал физвай рекьин 600 метрдин мензилда къир цана. Аниз экверни гъанва. Хуьруьн фонд тешкилна, кардик кутунва. ИкI, и четин вядеда колхоздин председателди, бязи депутатри ийидай хьтин крар алакьнава Жалалдиналай. Сагърай вич! Хуьруьнбуру адалай разивал ийизва, абуруз ам багьа, хъсан краралди истеклу я. Хуьре рехъ-хвал дуьзардайла, жегьилрихъ галаз мярекатар тешкилдайла, Жалалдинал меслятзава.
Хуьре исятда 7 вишелай виниз кIвалер хьанва, 2500 кас яшамиш жезва. Михьивилер, къайда хуьниз артух фикир гузва. И карда имамдини вичин таъсирлу гафаралди куьмек гузва. Къуншидал мад пуд хуьр ала — Экен, НуьцIуьгъ ва Зизик. Герек кар аваз, хабар гайила, Жалалдин, энгел тавуна, а хуьреризни физва.
Райсудин Набиев
