Мегьарамдхуьруьн райондин администрациядин пресс-къуллугъди хабар гузвайвал, 9-августдиз Хъартас-Къазмайрин хуьре неинки хуьруьнвияр, гьакI райондин агьалияр патални метлеблу вакъиа кьиле фена. И юкъуз шад гьалара алай аямдин спортдин майдан ачухна. Малум хьайивал, спортдин майдан туькIуьрайди меценат Леонард Нагъиев я.
Шад мярекатда райондин кьил Ф.Агьмедова, райадминистрациядин жавабдар къуллугъчийри, СМИ-дин векилри, хуьруьнвийри иштиракна. Лишанлу мярекатда иштиракзавай ксарихъ элкъвена, райондин регьбер тебрикдин гафар рахана.
— Агьалияр патал ихьтин метлеблу объектар кардик акатуникди санлай райондин къаматни хъсанвилихъ дегиш жезва. Шак алач, азад вахт сагъламвилин хийирдиз серфдай шартIар тешкилунин карда им мад са вилик финин кам я. Чпин дувулар рикIелай алуд тийизвай, хайи хуьр вилик финин кардик чпин кьетIен пай кутазвай ксар хьунал чна дамахни ийизва, абуруз рикIин сидкьидай чухсагъулни малумарзава, — лагьана Ф.Агьмедова.
Райондин кьили малумарайвал, спортдин майданар Мегьарамдхуьруьн ва Бут-Къазмайрин хуьрерани ачухнава ва, авай вири мумкинвилерикай менфят къачуналди, райондин руководстводиз хуьрерин мулкар абадвилихъ тухунин кIвалахар гележегдани давамардай къастар ава.
Вичин рахунра Фарид Агьмедова мергьяматлу крарик кьил кутузвай хъартасви, «Добротсервис» ООО-дин генеральный директор Леонард Нагъиеваз чухсагъул малумарна.
Хуьруьнвийриз шад вакъиа РД-дин общественный палатадин член Юнус Балабегова, Хъартас-Къазмайрин агъсакъалрин советдин председателди, Белиж поселокдин администрациядин кьили, органрин къурулушрин ветеранри, чкадин мектебдин директорди ва масабуру тебрикна.
Райондин кьил Фарид Агьмедова, меценат Леонард Нагъиева, агъсакъал Гьабибуллагь Нагъиева яру лент атIуналди, Хъартас-Къазмайрин агьалийриз спортдин хъсан майдан пишкешна. Вичи кьил кутазвай крар тамамарунин карда куьмек гунай Леонард Нагъиева райондин кьилиз разивилин келимаяр лагьана.
Эхирдай Советрин Союздин Игит Абас Исрафилован тIварунихъ галай 1-нумрадин ДЮСШ-дин жегьил футболистрин командади цIийи майдандал дуствилин лишанлу матч кьиле тухвана. Къейдна кIанда хьи, спортдин майдан алай аямдин итемишунар фикирда кьуна туькIуьрнава. Ана агьалийривай гьи вахтунда хьайитIани спортдал машгъул жедай шартIар тешкилнава.
«Лезги газет»
