ЭЙВАЗ ГУЬЛАЛИЕВАН — 50 ЙИС
6-декабрдиз лезги эдебиятдин уьмуьрда кьетIен вакъиа кьиле фена: Бакуда, Азербайжандин Рашид Бейбутован тIварунихъ галай манидин гостеатрда, лезгийрин машгьур шаир, публицист Эйваз Гуьлалиеван 50 йис тамам хьуниз талукьарнавай мярекат кьиле фена.
Зал сиве-сивди инсанрив ацIанвай. Дараматдин кьвед лагьай мертебада авай балхунрикни кваз кIвачел акъваздай чкаярни амачир. Межлисдал рахайбурукай сада къейд авурвал, Рашид Бейбутовалай гуьгъуьниз театрдин залда и кьадар инсанар кIватIай кьвед лагьай кас лезги шаир Эйваз Гуьлалиев я…
Юбилярдиз 50 йис тамам хьун мубаракиз Дагъустандай, Москвадай, Азербайжандин жуьреба-жуьре районрайни шегьеррай мугьманар атанвай. Абурун арада профессор Камал Абдуллаев, Бакудин Сураханы райондин “ЦIийи Азербайжан” партиядин аппаратдин регьбер Салман Абдулов, “Лезги газетдин” кьилин редактор — и цIарарин автор, Дагъустандин халкьдин артист Ширбет Рзакъулиев ва масабур авай.
Шииратдин межлис Руслан Шейдаеван ванцелди лентиниз къачунвай Э.Гуьлалиеван “Агат хъия” шиирдилай ва Майина Абдулмуталибовади и чIалариз кхьенвай манидиз туькIуьрнавай видеоклипдилай гатIунна.
Сифте гаф Азербайжанда гьуьрмет авай алимрикай сад, профессор Камал Абдуллаева лагьана. Гуьгъуьнлай сегьнедиз сад-садан гуьгъуьналлаз, Эйваз Гуьлалиеваз юбилей мубаракиз, Хачмаз райондин Лечет хуьряй тир муаллим Шихжамал Шихметов, Къебеледин Камарван хуьряй тир, Э.Гуьлалиеван шиирар азербайжан чIалаз элкъуьрнавай муаллим Къериб Гьуьсейнов, “Сувар” ва “Жигитар” ансамблрин регьбер Завир Нежефов, Э.Гуьлалиеван шиирар урус чIалаз элкъуьрнавай, эдебиятдин “Марвар” кIватIал арадал гъуник пай кутунвайбурукай сад тир Бести Нифтиева, “Уьфуькъ” тешкилатдин лезги чIалан дестедин регьбер Офеля Яхулова, шаирар, муаллимар тир Вакъиф Муьшкуьрви, Зиядхан Мурадханов, Шихверди Агъаев, Багьрам Залов, Оруж Оружев ва масабур экъечIна.
Лезгийрин машгьур манидар Магьира Шириновади, Сумгаит шегьердин музыкадин мектебда кIелзавай Гьуьрмет Исрафилова, Элшад Лебибова лагьай манийри, Ширбет Рзакъулиева кларнетдал ягъай авазри, “Жигит” ансамблдик квай аялри авур кьуьлери мярекат генани гурлу авуна.
Кьве сятни зура давам хьайи мярекат “Алам” журналдин кьилин редактор Кемран Къурбаналиевани Эйваз Гуьлалиева санал тухвана. Юбилярди кIелай эсерар мярекатдин иштиракчийри хушдиз кьабулна.
Эйваз Гуьлалиев чи эдебиятда гьеле лайихлу къимет таганвай шаиррикай сад я. Адан къелемдикай 6 ктаб хкатнава (5 — лезги, 1 — азербайжан чIаларал). Шаирдин шииратдин асас тема Ватан, лезги чилихъ, чIалахъ авай кIанивал, ватанпересвал я. Эйваз Гуьлалиев я Азербайжандин, я Урусатдин (Дагъустандин) писателрин союзрик квачтIани, халкьдин мецел, рикIел алай шаир я. Бакуда кьиле фейи лезги шииратдин межлисди и кар нубатдин сеферда тестикьарна.
Мегьамед Ибрагьимов
