И йикъара чун Эминхуьруьн Культурадин кIвалин кIвалахдихъ галаз таниш хьана. Вилик йисара эцигнавай дараматда кардик квай и маканда хъсан къайда, михьивал авайди, ана ремонтрин кIва­лахар тухванвайди гьасятда кьа­тIуз жезва.

Цларал алай “Абуру Ватан патал женг чIугуна”, “Лезги чIал хуьх ва вилик твах!”, “СтIал Сулейман — ХХ асирдин Гомер”, “Етим Эмин — лезги поэзиядин чирагъ”, “Советрин Союздин Игитар”, “Дагъустандин Автономиядин 100 йис”, “Чун терроризмдиз акси я”  ва маса стендри, фотомонтажри иниз къвезвайбурун фикир чпел желбзава.

Культурадин кIвалин художественный руководитель, бажарагълу манидар Асан Селимова чаз лагьайвал, ина милли музыкадин алатрин, спортдинни сагъламвилин, хордин, шахматринни шашкайрин кружокар кардик ква. И кружокра 60-дав агакьна хуьруьнвийри иштиракзава.

Культурадин кIвалихъ 12 касдикай ибарат тир художественный самодеятельностдин хъсан коллектив ава. Адан активный иштиракчияр тир СултIанагьмед Хидирова, Се­лим Селимова, Алла Буржалиевади, Раижат Жигеровади, 1966-йисуз Москвада кьиле фейи Дагъустандин культурадин декададин иштиракчи Гьажибала Гьажимисриева, Сиграт Мегьамедова ва масабуру хуьре ва районда тухузвай культурадинни шадвилерин мяре­катра иштиракзава, манияр лугьуналди, музыкадин алатар ягъуналди, кьуьлер авуналди, агьалийрин гуьгьуьлар шадарзава.

Культурадин кIвалихъ кIелдай­бурун ва 200 касдиз ацукьдай чкаяр авай тамашачийрин залар гала. Иниз къвезвайбуру газетрикайни журналрикай, шахматрикайни тIа­майрикай менфят къачузва.

Хазран  Кьасумов