Аскер-интернационалист Абдул Саидован тIварунихъ галай Эминхуьруьн юкьван школадин гуьрчегдиз безетмишнавай актовый залда “2022-йисан хайи чIалан лап хъсан муаллим” лишандик кваз тухузвай республикадин конкурсдин муниципальный пай кьиле фена. Ана райондин школайра лезги чIалан ва литературадин тарсар гузвай 6 муаллимди иштиракна. Абурун пешекарвилиз ва устадвилиз 7 касдикай ибарат тир жюриди (председатель — РУО-дин начальникдин заместитель Къачабег Аминов) къимет гана. Нетижада конкурсда, 114 балл къачуналди, 1-чкадиз ЦIийи поселокдин юкьван школадин муаллим Индира Шидиева лайихлу хьана. 2 ва 3-чкаяр Сийидрин юкьван школадин муаллим Диляра Рамазановади ва Зизикрин юкьван школадин муаллим Салигьат Гьажибалаевади кьуна.
Конкурсда тафаватлу хьайи ва иштиракай муаллимрив райондин образованидин управленидин грамотаяр вахкайдалай гуьгъуьниз чун районда лезги чIалан лап хъсан муаллим лагьай тIварцIиз лайихлу хьайи И.Шидиевадихъ галаз гуьруьшмиш хьана.
Индира Алидхуьряй тир Мегьамедтагьир ва Эрзихалум Аллагькъулиеврин хизанда дидедиз хьана. Яргъал йисара вири уьлкведа машгьур тир Кьасумхуьруьн консервиярдай заводда намуслудаказ кIвалахай дидедини бубади чпин 6 веледни низам-ахлакь аваз тербияламишна.
— Дидедизни бубадиз закай духтур хьана кIанзавай, — лугьузва Индира Мегьамедтагьировнади. — Амма зи рикIе гъвечIи классра кIелзавай йисарилай инихъ муаллим хьунин къаст авай. Мурад кьилиз акъатунал, виридалайни гьуьрметлубурукай сад тир муаллимвилин пешедин иеси хьунал къе за шадвал ийизва ва жув бахтлу инсан яз гьисабзава.
И.Шидиевади и келимаяр лагьайла, зи рикIел туьркверин шаир Надым Хикмета лагьай гафар хтана: “Ашкъидалди кIвалахал физвай ва шадвилелди кIвализ хквезвай инсан бахтлу кас я”. Ара датIана 37 йисуз рикIик шадвал кваз кIвалинни школадин рехъ атIузвай Индира муаллимдиз и келимаяр хас яз аквазва заз.
Кьасумхуьруьн 1-нумрадин юкьван школа лап хъсан къиметар аваз акьалтIарай руш 1980-йисуз Дагъустандин педагогвилин институтдин филологиядин факультетдик экечIна, 1985-йисуз анаг акьалтIарна.
Жегьил муаллимди вичин зегьметдин рехъ Кьасумхуьруьн 1-нумрадин юкьван школада урус чIаланни литературадин муаллимвиле кIвалахунилай башламишна.
1994-йисалай инихъ И.Шидиевади ЦIийи поселокдин юкьван школада дидед чIалан ва литературадин тарсар гузва. КIвалахда тежрибалу муаллимдихъ гьар йисуз агалкьунар жезва. ИкI, Индира Мегьамедтагьировнади тарсар гузвай аялри лезги чIалай тухузвай олимпиадайра кIвенкIвечи чкаяр кьаз са шумуд йис я. Идан гьакъиндай муаллимдиз Дагъустан Республикадин образованидин министерстводи ва райондин образованидин управлениди ганвай гьуьрметдин грамотайри шагьидвалзава.
И. Шидиевади чирвилер гайи ва гуьгъуьнлай чпикай лезги чIаланни литературадин муаллимар хьанвай гадайрин ва рушарин кьадар тIимил туш.
— Индира Мегьамедтагьировнадикай рахадайла, “Муаллим”, “Тербиячи”, “Насигьатчи” гафар чIехи гьарфарилай кхьиниз лайихлу я, — лугьузва школадин директор Бег Абдулашимович Ягъибегова. — Ада райондин дидед чIалан муаллимрин конкурсда гъалибвал къачун тIебии кар я. Адахъ гьам дерин чирвилер, гьамни кIвалахдин гзаф йисарин тежриба ава. Кьилинди, адан рикI хкянавай пешедал ва аялрал гзаф ала. ИкI хьайила, кIвалахда агалкьунарни жезва.
Индира муаллимдикай разивилин келимаяр Къачабег Аминова, РУО-дин патав гвай информациядинни методикадин центрадин директор Муминат Бабахановади ва райондин хайи чIаларин муаллимрин ассоциациядин руководитель Гуьзел Межидовади лагьана.
Малум хьайивал, И.Шидиевади кIелзавайбур лезги чIалал ва литературадал ашукьарунин мураддалди ачух тарсар, семинарар, мастер-классар, лезгийрин машгьур шаиррин ва писателрин юбилейрин мярекатар, кIелзавайбурун конференцияр кьиле тухузва.
Индира Шидиева школада 6-классдин руководителни я. 15 аялди кIелзавай и класс ахлакьдин, низамдин, кIелунрин жигьетдай хъсанбурукай сад я.
И.Шидиевадиз школадин муаллимрин, кIелзавайбурун ва абурун диде-бубайрин патай лайихлу гьуьрмет ава.
Хазран Кьасумов
