Бегьер кIватI хъийизва

Дагъустанда 7,3 агъзур гектардай 209,1 агъзур тонн бахчадин няметар кIватI хъувунва. Алай вахтунда буранар кIватI хъувун давам жезва. Абур гьеле тахминан 2400 гектардай саки 52 агъзур тонн кIватI хъувунва. Хабар гузвайвал, буранрин бегьер кIватI хъувунал гьалтайла, кIвенкIвечи чкайрал Къизляр, Ногъай, Бабаюрт ва Хасавюрт районар ала.

Ведомстводин телеграм-каналди раижзавайвал, республикада техил кIватI хъувунни кьиле физва. ИкI, зулун магьсулрин бегьер 85,6 агъзур гектардай кIватI хъувунва. Бегьерлувили гьар са гектардай 25,4 центнер тешкилзава. Санлай къачурла, кIватI хъувунвай и бегьердин кьадар 217,7 агъзур тонндив агакьнава.

Гатфарин магьсулрин бегьердиз талукь делилрикай рахайтIа, 22,8 агъзур гектардай кIватIна акьалтIарзава. Бегьерлувал — гектардай  24,7  центнер. Санлай къачурла, кIватI хъувунвай и бегьердин кьадар 56,4 агъзур тонндиз барабар я.

РикIел хкин, виликдай «РГВК»-дин телеграм-каналди Дагъустандин аграрий­ри 20 агъзур гектардин майданрай гьеле 615 агъзур тонн салан майваяр кIватI хъувунвайдакай, гьа са вахтунда фермерри 145 агъзур тонн картуфар къачунвайдакайни хабар ганай.

Гьакъи гун лазим яни?

«Дагъустан патал газ» телеграм-ка­нал­ди, газдин тадаракдихъ техникадин­ жи­гьетдай гелкъуьн патал икьрар кутIун­дайла, кIвалин иесиди и кардай гьакъи гун лазим яни, тушни гьадакай раижзава.

Кьилди къачуртIа, чешмеди абонентдин тIварцIелай ихьтин суал гъизва:

— КIвале газдин тадаракдихъ техникадин жигьетдай гелкъуьн патал икьрар кутIундайла, и къуллугъдай гьакъи гун лазим яни?

И суалдиз чешмеди гузвай жавабдай малум жезвайвал, и икьрар кутIунунай гьакъи гузвач. КIвалин иесиди анжах вичиз къуллугъ авур дуьшуьш хьайила, ахпа гьакъи гузва, яни кIвале газдин вири техникадиз техникадин жигьетдай гелкъуьн кьиле тухвайла ва абуруз килигайла.

КIвалахар кьилиз акъудун газовщикди­ къул чIугун патал абонентдив вугузвай­ махсус актуналди тестикьарзава (чек-лист)­. А актуна кьилиз акъуднавай къул­лугъ­рин ва къиметрин делилар къалурда. Умуми къимет газдин тадаракдин кьадаррилай ва характеристикайрилай аслу я. Юкьван гьисабдалди а къимет 1500 (агъзурни вад виш) манатдикай ибарат хьун мумкин я.

Гьа са вахтунда чешмеди къейдзавайвал, винидихъ вичикай ихтилат физвай икьрар хьун газ агакьарун патал чарасуз шартI я.

Къулай рекьер

«Мегьарамдхуьр-Ахцегь-Рутул» рехъ ремонт хъувунин кIвалахар давам жезва. Идакай РД-дин транспортдин ва рекьерин майишатдин министерстводин те­леграм-каналди хабар гузва.

Кьилди къачуртIа, чешмеди къейдзавайвал, «Уьмуьр патал къурулуш» милли проектдин сергьятра аваз, Ахцегь районда «Мегьарамдхуьр-Ахцегь-Рутул» рекьин «км 75 — км 81» участок ремонт авунин кIвалах давам жезва. Къейдзавайвал, и рекьи Мегьарамдхуьруьн, Докъузпара, Ахцегь ва  Рутул районар алакъалу ийизва.

И кIвалахар кьиле тухунин сергьятра аваз, яд санай масаниз акъудунин турбаяр хъсан гьалдиз хкизва, рекье къирдинни бетондин къаришма цазва, гьерекат ха­тасузди хьун патал рекьерин лишанар эцигзава.

Сентябрдин эхирра винидихъ къалурнавай участокдин ругуд километр ремонтна акьалтIарун пландик кутунва.

Гужлувал артухарнава

Электросетдин комплексдин объектар 2025-2026-йисарин зулунни хъуьтIуьн муддатдиз гьазур хьун кьиле физвай къай­дадикай «Россети Северный Кавказ»­ — «Дагэнерго» филиалдин кьилин инженер Саид Султанова РД-дин премьер-ми­нистр А. Абдулмуслимоваз доклад авуна. Идакай Дагъустандин Гьукуматдин те­леграм-каналди хабар гузва.

Чешмеди раижзавайвал, 2025-2026- йисара, агьалияр электроэнер­гиядалди таъминарун дурумлуди авунихъ элкъуьр­навай махсус программадин­ сергьятра аваз, 30 трансформатор дегишарун фикирда кьунва. ГьакIни «Россети» карханади ЦП-рин (центр питания) гужлувал артухардай серенжемар кьилиз акъудзава.

Алай вахтунда 23 подстанциядал и кIвалахар тамамарнава. И серенжемар кьиле тухуникди артух хьанвай гужлувилин кьадар, санлай къачурла, 134 МВА-дикай ибарат я.

Гьазурайди — Муса  Агьмедов