Алай йисан гатун вахтунда сагъламардай кампания кьиле тухунин месэла веревирдна 28-апрелдиз РД-да аялар сагъламарунин ва абурун ял ядай вахт дуьздаказ кьиле тухунин месэлайрай са шумуд идарадин векилрикай ибарат комиссияди. Адан кIвалахда РД-дин Гьукуматдин Председателдин заместитель Муслим Телякавова, РД-дин образованидин ва илимдин министр Ягья Бучаева, жуьреба-жуьре идарайрин ва министерствойрин векилри, гьакIни республикадин муниципалитетрин кьилери иштиракна.
“Кьилин месэла — аялри ял ядай ва сагъламардай лагеррин кIвалах, вири истемишунар фикирда кьуна, тешкилун ва финансрин рекьяй авай мумкинвилерин сергьятра аваз жезмай кьван гзаф аялар и кардал желб авун я. ЦIи, алатай йисав гекъигайла, и рекьиз чара ийизвай пулдин такьатрин кьадар 50 процентдин артухарнава, талукь яз гатуз пулсуздаказ ял ягъиз жедай аялрин кьадар гзафардай мумкинвал арадал атанва. Планламишнавайвал, алай йисуз республикада аялрин 126 лагерди кIвалахда, абурукай 26 шегьеррилай къерехра авай сагъламардай идарайрин ва 100 лагерь, образованидин идарайрин бинедаллайбур, яни аялри йикъан вахтунда ял ядайбур я. Чна 2022-йисуз 30 агъзурдалай гзаф аялриз ял ядай ва сагъламардай мумкинвал гун пландик кутунва. Им алатай йисандалай 12 агъзур аялдин гзаф я”, — къейдна Муслим Телякавова.
“Сад лагьай сменади шегьеррилай къерехра авай сагъламардай идарайра ял ягъун патал, санлай къачурла 94,5 миллион манатдин къимет авай 5580 путевка маса къачунва”, — лагьана Я.Бучаева. Ада хабар гайивал, гатуз аялрин ял ядай вахт дуьздаказ тешкилуниз гьазурвал аквадайла, кьетIен фикир педагогвилин ва вожатыйрин кадрияр гьазурунизни гана. И йисуз Дагъустандин образование еримлу авунин институтдин бинедаллаз 267 касди гьазурвал акуна. Майдиз аялрин лагерра кIвалахдай фикир авай мад 50 педагогдиз ва студентриз чирвилер гуда.
«Лезги газет»
