Шикилдай аквазвайди Махачкъала шегьердин 38-гимназиядин 4-классда кIелзавай Наида Акимова я. Ада и йикъара Каспийскда кардик квай республикадин образованидин центрада мектебда кIелзавай ва бахчайра тербия къачузвай аялрин арада кьиле фейи “Илимри жаванриз ем гузва” ахтармишунрин ва проектрин кIвалахрикай ибарат республикадин дережадин конкурсдин эхиримжи паюна 1-чка кьуна.
Аялар ахтармишунрин кIвалахрал желбунин макьсаддалди 19 хилекай ибарат яз тешкилай гегьенш мярекатда республикадин аялрин бахчайра, мектебра тербия ва чирвилер къачузвай аялри, муаллимри (санлай 500-далайни гзаф ксари) иштиракна.
Чирвилер къачунин рекье викIегьвал къалурзавай руша мектебдани хъсан къиметралди кIелзава. Конкурсда иштиракзавай аялрин кIвалахриз, чирвилериз, алакьунриз къимет гайи жюридин дестеди “Сифтегьан классар” хиляй Наидади кхьей “Ерилу хъвадай яд сагъламвилин замин я” ахтармишунин кIвалах виридалайни хъсанди яз гьисабна.
Нетижаяр кьунин, гъалибчияр дипломралди къейдунин шад мярекатда РД-дин Гьукуматдин Председатель А.Здунова, РД-дин Гьукуматдин Председателдин заместитель — РД-дин образованидин ва илимдин министр У.Омаровади иштиракна. Наидадив РД-дин образованидин ва илимдин министр У.Омаровадин ва РД-дин муаллимрин Ассоциациядин президент А.Байрамбеговадин къул алай I дережадин димлом ва кубок вахкана.
Малум хьайивал, Наида Акимова чи машгьур писатель, алим Къурбан Акимован хтул я. Къуй гъвечIи рушахъ гележегда илимдин рекье чIехи агалкьунар хьурай!
Чи мухбир
