И мукьвара Мегьарамдхуьруьн райондин Советский хуьруьн аялрин “Красная шапочка” тIвар алай бахчадай тIуьнилай зегьерламиш хьунин лишанар аваз сифте — 14, вири санлай 22 аял больницадиз аватна.
7-мартдиз Мегьарамдхуьруьн райондин кьил Фарид Агьмедова больницада аялрал кьил чIугуна. Ам райондин центральный больницадин кьилин духтур Гьажибала Беглеровахъ, садакай масадак акатдай азарар сагъардай духтур Светлана Эфендиевадихъ, медицинадин рекьяй къуллугъчийрихъ, аялрин диде-бубайрихъ галаз гуьруьшмиш хьана. Диде-бубайрихъ галаз рахадайла, Ф.Агьмедова аялар фад сагъ хъхьун алхишна, медперсоналдиз тади гьалда куьмек агакьарунай сагърай лагьана.
7-мартдиз больницадиз аватнавай аялрин саки са паюнин гьал хъсан хьанвай. 10-мартдиз лагьайтIа, больницадиз аватай вири аялар кIвалериз аххъайна. Аялрин уьмуьрдиз къурхулувал авач.
Райондин кьили талукь тир тапшуругъар гана, арадал атанвай гьалар вичин гуьзчивилик кутунва. Ам кIвалериз аххъайнавай аялрихъ галазни рахана.
Ф.Агьмедова аялрин гьалдикай вичиз гьар сятда хабар гун тIалабнава. Идахъ галаз сад хьиз, ада 7-мартдиз райондин образованидин идарайрин кьиле авай ксарихъ галаз тухвай совещанидал хабар гайивал, бицIекар больницадиз аватунин себебрай кьил акъудун патал рабочий десте тешкилнава.
Идалайни гъейри, и дуьшуьш РД-дин Кьил Владимир Васильева, Дагъустандин здравоохраненидин министерстводини гуьзчивилик кутунва. В.Васильеван тапшуругъдалди кьиблепатан территориальный округда Дагъустандин Кьилин патай тамам ихтиярар ганвай векил Фуад Шихиев Мегьарамдхуьруьн райондиз фена.
Гьелелиг аялар квелай зегьерламиш хьанватIа, кьил акъудиз хьанвач.
«Лезги газет»
