Кьасумхуьрел “Там-там” ресторанда Виридуьньядин дишегьлийрин йикъаз талукьарнавай гурлу мярекат кьиле тухвана. Ам ачухай райондин кьил Нариман Абдулмуталибова кIватI хьанвайбуруз сувар мубаракна, район яшайишдин, экономикадин ва маса рекьерай вилик финик дишегьлийри еке пай кутазвайди къейдна.
Тебрикдин келимайрилай гуьгъуьниз Н.Абдулмуталибова кIвалахда агалкьунрай ЦРБ-дин фельдшер Айисат Аминовадив, Кьулан СтIалрин юкьван школадин директордин заместитель Зоя Гьабибулаевадив, Кьасумхуьуруьн администрациядин пешекар Фатима Гьайвазовадив, аялрин “Чубарук” бахчадин музыкальный руководитель Индира Рашидовадив гьуьрметдин грамотаяр, райондин музыкадин хордин солистка Бесханум Абдулазизовадив, Кьасумхуьруьн майдандал михьивилерзавай Нарима Гьасанагъаевадив, КIварчагърин юкьван школадин муаллим Гьуьруьят Къадималиевадив ва районда кардик квай МФЦ-дин директордин заместитель Анфиса Шагьмирзоевадив райондин кьилин тIвар кхьенвай гъилин сятер вахкана.
Мярекатда иштиракзавай дишегьлийриз алхишдин, тебрикдин келимаяр Цмуррин хуьруьн кьил Раида Алибеговади, райондин образованидин управленидин начальникдин заместитель Къачабег Аминова, Дагъустандин халкьдин шаир, культурадин отделдин начальник Майрудин Бабаханова, ЦРБ-дин кьилин духтур Жафер Къурбанисмаилова, ЦIийи Макьарин хуьруьн администрациядин кьилин пешекар Абидат Рагьимхановади ва масабуруни лагьана.
Суварин мярекатдал жуьреба-жуьре конкурсар тухвана, анра гъалиб хьайибуруз пишкешар гана.
Дагъустан Республикадин лайихлу артист Омар Меликова, манидарар Азим Ризаева, Эрзиман Османова, Тофик Мегьамедова, Бесханум Абдулазизовади, Роберт Абакарова, Замир Гьажиева лагьай манийри, “Чубарук” бахчадин аялрин, “Куьре” ансамблдин кьуьлери мярекат мадни гурлу авуна.
Виридуьньядин дишегьлийрин йикъаз талукьарнавай шадвилин мярекатар райондин саки вири хуьрера — культурадин маканра, школайра, аялрин бахчайрани кьиле тухвана.
Хазран Кьасумов
