Кьасумхуьрел кардик квай “Куьредин ярар” культурадин центрадин типографияда мукьвара Гуьневи Эмирбадин “Впечатления” тIвар алай ктаб чапдай акъатна.
Гуьневи Мегьарамдхуьруьн райондин Советский хуьре яшамиш жезвай Эмирулла Магьарамован литературадин тахалус я. Ам 1938-йисуз кьакьан дагъдин Филиф Гуьне хуьре дидедиз хьана. Кьисметди ам сифте КцIариз, анайни Дагъустандиз акъудна.
Гуьневидихъ урус чIалан литературадин ва юридический кьилин образование ава.
Кьасумхуьрел, “Куьредин хабарар” газетдин редакцияда Гуьневи Эмирбадихъ ва адан цIийи (кьвед лагьай) ктабдихъ галаз таниш хьунин мярекат кьиле фена. Анал рахай “Куьредин ярар” культурадин центрадин председатель Агьмедпаша Агьмедпашаева, “Куьредин хабарар” газетдин кьилин редактор Асият Мирзалиевади, журналистар ва писателар тир Гьажи Ильясова, Абидин Камилова, и цIарарин авторди ва маса ксари вичи гьам лезги, гьам урус чIаларал яратмишзавай, кхьинин кьетIен хатI, бажарагъ авай Гуьневидин алакьунриз ва ктабда авай эсерриз хъсан къимет гана.
Эхирдай рахай ктабдин авторди вич хушвилелди кьабулунай, гуьруьш тешкилунай, вичин тIварцIихъ тебрикдин, алхишдин келимаяр лугьунай “Куьредин ярар” культурадин центрадин векилриз ва “Куьредин хабарар” газетдин редакциядин коллективдиз чухсагъул лагьана, мярекатдин иштиракчийриз пишкеш яз вичин ктабар гана.
Хазран Кьасумов
