— Вири гъуьлягъар вагьшийрик (йиртижийрик) акатзава.
— Гзаф гъуьлягърин вилерин экв зайиф я. Амма абуруз чимивал квай чкаяр хъсандиз чир жезва. Муькуьбурулай тафаватлу яз, тарара жедай гъуьлягърин вилериз хъсандиз аквада.
— Исятда авай гъуьлягърикай виридалайни екеди сетка хьтин питон яз гьисабзава. И жуьрейрин заланвал 100 килограммдив ва яргъивал 10 метрдив агакьда.
— Заланвилел, яргъивилел гьалтайла, анаконда тIвар алай гъуьлягъни саки сетка хьтин питон кьван ава.
— Руфун галчIуриз фидай гьайванрикай гзафни-гзаф хаталуди чIулав мамба я. И гъуьлягъ виридалайни гзаф зегьерлуди, йигинди ва ажугълуди яз гьисабзава.
— Лап еке вад гъуьлягъдик королевский кобрани акатзава.
— Бязи гъуьлягърилай тухвал гьисс ийиз алакьзавач, гьавиляй абур тIуьн артух хьуникди рекьизвай дуьшуьшарни жезва.
— Виридалайни зегьерлу 25 жуьре гъуьлягърикай 21 жуьре Австралияда яшамиш жезва.
— ЦIийи Зеландияда гъуьлягъар саки авач. Ина анжах це яшамиш жезвай кьве жуьре гъуьлягъар ава, амма це абур хаталу туш.
— Азияда лув гуз алакьзавай гъуьлягъарни ава. Чпин пакун тIвалар ахъайна, абуру тарцин са хилелай муькуь хилел “лув гузва”.
— Гъуьлягъар ахтармишзавай илимдиз серпентология лугьуда.
— Мез къецихъ акъудуналди, гъуьлягъди ни гьиссзава.
— Алай вахтунда гъуьлягърин тахминан 3600 жуьре малум я.
— Вьетнамдин бязи ресторанра кобрадин иви квай чехир гузва.
«Лезги газет»
